正當歐元區為財政緊縮同刺激經濟爭得面紅耳赤，大西洋彼岸嘅美國兩大黨亦陷入應否勒緊褲頭過苦日子嘅爭拗，臨近總統大選，究竟美國緊縮派或刺激經濟派何者會佔上風，李宏博覺得選民意向最難睇透。
最近奧巴馬政府話會明年削減聯邦政府支出近千億美元，好明顯受到對手共和黨壓力。不過，諾獎得主斯蒂格利茨就擔心美國政府一旦收緊開支，當歐債危機惡化，可能拖累美國經濟陷入雙底衰退，而且造成貧者愈貧、富者愈富嘅現象，加劇社會分化。
斯蒂格利茨最擔心嘅係，如果美國政府真係落實緊縮措施，屆時定必拉高失業率，拖低國民收入，一旦政府稅收大大「縮水」，又會搵一些社會服務「開刀」，例如削減教師、警務人員、消防員等職位。
就以削減教育開支為例，佢擔心當一張美國大學「沙紙」愈嚟愈貴嘅同時，美國國民整體收入和財富就愈嚟愈「縮水」，家長要供子女完成大學教育自然愈嚟愈辛苦，而美國大學生亦往往要背負更多學生貸款，負擔唔起昂貴學費嘅年輕人惟有投身低薪工作，社會貧富差距只會愈來愈大。
斯蒂格利茨反而建議政府，應該加大教育開支和增加失業福利，紓緩國民的經濟壓力，咁樣反而有利刺激就業和經濟增長。當經濟有所增長時，政府稅收水漲船高，經濟實力便可望提升。
WORLD 李宏博