近期好多券商股返炒，大家認為係阿爺就嚟派禮物，有北水到而令證券行受惠，金占士知道有幾隻時不時玩吓賣盤概念，確係有買家，而且來來去去係某幾家中資證券集團，但目前都只係得個講字，因為個老細開出天價嚇親人，反而有隻無上市但規模幾大嘅投行，就同某大中資行傾得好埋，有機會今年內「拉埋天窗」。
過去十幾年來，用紅白藍膠袋裝滿人仔嚟證券行開戶嘅場面，金占士見過晒，真係有錢嘅內地大款股民，已經喺香港開晒網上證券戶口，炒咗好多年港股、美股，透過嚟緊開通喺港股ETF、專項ＱＤＩＩ嘅資金只係來自一般股民。
中資行心裏明白，大水喉始終係一班舊客，國家對人民幣同資金流動會進一步開放，呢班內地大款會靜待時機，進一步將資產透過投資分散存放境外，有關調動必須秘密進行，而同時在中、港都有投行業務嘅「一條龍」中資集團，自然特別受大款青睞。
所以內地十大證券行，過去一直在港洽購證券同投行公司，當中成功例子係前身大福嘅海通（00665）。
金占士聽到一間屬十大嘅中資行，好可能傾得成本港一家中型外資投行，呢間行麻雀雖小，但研究部、資產管理、上市保薦同包銷業務一應俱全，在港坐陣嘅更加係重磅人物，當年佢自行創辦呢間投行，其後○七年被外資集團購併，可惜咁多年都係「半紅不黑」。
呢間行近年保薦過幾隻新股，可惜都表現麻麻，部分上市不久就發盈警，今次呢位大哥做中間人，希望將檔嘢賣畀中資，聽講係希望日後可以食中國呢條水，好過跟鬼佬。
金占士