喺最近幾年，國債都係一年發行一次，雖然市場經常呼籲中央加密發行頻率，不過，絲絲聽聞做埋呢一轉，今年唔會再有國債出，要買就快手喇！
保安為由 棄租直升機
既然咁罕有兼搶手，幾家中資銀行亦一如以往落力宣傳。工銀亞洲舊年曾經租用直升機宣傳，效果幾好，但聽聞今年因為保安理由，只能改喺機場抵港大堂，同埋東隧、西隧出入口賣廣告。
被財政部委任為國債發行及交存代理嘅交銀香港，就會利用渡輪船身賣廣告，建行亞洲就揀咗有過百年歷史嘅電車宣傳。
據悉，兩間銀行仲會租用流動展覽車，將國債發售嘅消息帶到全港各區添。至於中銀香港，絲絲聽講佢會喺舊中銀大廈掛banner。