大家樂（00341）一哥陳裕光（Michael）舊年底宣布，會同羅開光（Sunny）角色大兜轉，Michael卸下首席執行官兼首席財務官，淨係做集團主席，由Sunny頂上做首席執行官，即係一個由台前轉幕後，另一個就相反。佢一路嘅宗旨係做到客人、員工薪酬同股東回報都「大家快樂」，日後大家快唔快樂，就要睇Sunny喇。
關於工資、食物價格呢啲社會爭議問題同壓力，Michael領教過唔少，Michael認為社會各界多年來嘅熱心，係「愛之深、責之切」，真係要準確咁拿捏好個平衡點，做到三者都「大家快樂」。所以Michael對公司、員工同客人都「無愧於心」，即使尚未見證公司最光輝嘅時刻，自己就要卸去三分之二職務，Michael都好瀟灑咁講咗句「人始終會走」，非常豁達。
絲絲尋日見佢充滿離愁別緒，Michael話自己服務咗大家樂廿多年時間，都算係告一段落同功成身退。尋日佢哋派成績表，有「少少遜色」，Michael猛話集團最光輝嘅時刻未至，佢好有信心公司近兩年已做足根基投資，集團雙位數增長嘅神話，喺今年屬可兌現嘅願望。