香港雖然畀紐約搶咗集資天堂嘅地位，但無可否認，上市公司嘅行業真係夠多元化，絲絲尋日聽耀才證券（01428）主席葉茂林講，話佢私人持有嘅的士高，都有意喺五年內搞上市，嘩，咁佢咪搖身一變成為「的士高大王」！
佢自爆話喺中環經營緊三間的士高，喺開業後六個月已經可以歸本，過去一年賺四千幾萬。每間裝修三千萬，每月租金百幾萬，計一計，真係好賺錢！佢仲同絲絲講，長遠目標係將旗下嘅的士高上市，只要開夠八至十間就可以考慮喇，目標係五年時間完成！
絲絲真係估都估唔到佢會搞的士高生意，佢唔煙唔酒，似足絕頂好男人，原來當中可以話係一個傳奇，想當年，係為咗幫一個相識好耐嘅朋友，畀咗五百萬佢投資第一間，之後就做到有聲有色，依家仲係佢打理全盤生意添！葉茂林呢個朋友真係唔話得，都算係好心有好報吖。
雖然近年香港經濟景氣麻麻哋，但葉茂林就覺得消遣娛樂同經濟成反比，而且趨向年輕化，啲八、九十後無憂無慮，揮金如土，加埋啲自由行高消費力，基本上當咗蘭桂坊係一個旅遊景點，令到近年的士高發展「砰砰聲」，不過佢就堅持，未來開新舖都唔可以脫離中環或者蘭桂坊，因為比起尖沙咀同銅鑼灣都有優勢，而喺內地發展都係另一個選擇。
余詩韻