數據唔理想，評級機構穆迪出招，調低多間銀行評級，恒指上周五萬九關不保，失守10日平均線，成交跌到全月低位的379億元。全周計恒指上上落落，最終都要跌238點，日均成交金額只有434億元，一句講晒，市場正值「三無」時期：無人氣、無焦點、無神話。
今年以來成交每況愈下，買賣兩閒，人氣超低唔再講。市場氣氛好壞參半，恒指升不了多少，跌又未跌到恐慌式拋售的狀況，半年將近過去，恒指升完一輪又幾乎回到起步點，後市睇唔通，惟有繼續炒波幅。
商品價格跌完又跌，連視為避險資金出路之一的黃金都企唔穩，上周黃金股全挫。美國延長扭曲操作，第三季度推QE3的機會微乎其微，黃金技術走勢呈雙頂，若然短線有反彈，不妨考慮冷敲黃金PUT輪，黃金法巴沽（10146）今年九月六日到期，行使價1,500美元，實際槓桿約8倍，引伸波幅38%。
Handsome哥