人哋成日話賓卡圈光怪陸離，金占士都聽唔少「爆笑料」。聽講最近又有「笑料」，有投行高層喺機艙搞事，仲畀人報公安拉咗，最惹笑係單嘢畀人喺微博公開咗，尋日喺行內瘋傳，搞到班賓卡冇心機做嘢。
金占士睇過呢個微博，應該係一個由航空業人士所發嘅微博，而且喺友儕間瘋傳咗好多轉。
個故事係咁嘅，有一位喺投行界頗具名氣嘅賓卡，日前喺飛機起飛之際，係都要講手機，機艙服務員見狀梗係上前阻止啦，但呢位賓卡就「意見接受、態度照舊」，一於繼續「通話」；逼到連機長都要出嚟勸說，佢竟夠膽以惡劣態度同高亢聲調回應「百分百不關機」，最後機長無計，惟有通知地面公安，飛機降落後，立即將嗰位賓卡拘捕兼帶走。
據悉，嗰位賓卡貴為某歐資投行嘅主管級人馬。如果呢個過程係真嘅話，咁就會有好多手尾跟喇，佢依家已經成為「微博紅人」，就算公安罰款了事，睇怕航空公司都會將佢列入黑名單，真可謂「一次放縱、後患無窮」喇！
金占士