絲絲講場：美麗家園喜抽靚冧巴
中國人一向都好注重意頭，發發聲就最「老利」，有老友同絲絲講，下星期有隻新股美麗家園會招股，仲話佢好架勢添，因為佢個上市冧巴係1237，國語讀音「1、2、3、7」，「7」同起或喜讀音相近，董事長吳哲彥就覺得好好意頭，滿心歡喜！
無論「起」又好、「喜」又好，都係好嘢嚟，「起」象徵住蒸蒸日上，「喜」就唔使講都知係「老利」啦。
港首隻戶外木製品股
絲絲聽講呢個上市冧巴係由吳總親自抽中㗎，並唔係畀錢買番嚟，咁好手氣，莫非真係喜從天降？吳總仲話覺得係意外驚喜，希望日後公司風生水起咁話。
趁住個市場氣氛穩定啲，今個禮拜啲新股湧住嚟開動吸水大計，但係到目前為止，普遍嘅招股反應就麻麻哋。聽聞美麗家園將會喺下個星期一開始公開發售，如果市場反應好，美麗家園又可以成功上到市，將會係香港第一間戶外休閒木製品嘅上市公司，咁就真係值得可喜可賀喇！佢嘅集資額唔算多，大約2億左右之嘛，相信都可以順順利利啩！
余詩韻