今年唔少城中富豪都積極交棒畀下一代，不過，王氏港建（00532）主席兼行政總裁王忠桐每年開股東會，都係嗰句「無咁快退休」，佢仲話「身體好，做咩退休」，就連公司非執董許宏傑提出退休，王主席都耍手擰頭，再以自己做例子，勸老友繼續做，唔怪得之股東們喺會上要祝佢哋長命百歲、身體健康啦！
問到曾為無綫電視藝員的兒子王賢誌何時會接班，王主席就坦言，為人父母對自己仔女當然了解，知道阿仔做生意嘅興趣不在公司業務，況且公司已有班底，管理好易，但就要專業人士先得，所以「唔會傳畀自己仔女」囉。不過，王主席補充，集團依家唔係任何事都要自己理，佢一向都主張權力下放。
雖然尋日股東們都好似好想王主席再提私有化，不過，經過兩次提私有化都失敗，王主席就話疊埋心水「搞好公司先再諗」，皆因每次搞私有化，王氏都要自掏腰包，有關費用更高達2,000萬元。難得有股東提議主席考慮將公司「賣殼」，實行變相私有化，但王主席就寧願等適合時機，相當有氣量咁話「做事要過到自己嗰關先」，睇嚟想上岸嘅股東們，都係要等吓先啦。