正當李宏博睇實歐元區示範咩叫「鑊鑊新鮮、鑊鑊甘」之際，投資分析界重量級人物John Mauldin就望實美國，唔好以為佢睇好美國經濟增長，佢唱反調之餘，仲要引述個老友話美國「正同災難大拋媚眼」（Flirtin' with Disaster），都算係黑色幽默。
房地產作為美國主要經濟動力，以往佔GDP有5%以上，近兩年房屋銷售淡靜，樓市表現乏善可陳，依家只佔GDP的2.3%，屬低水平。五月份製造業採購經理指數 （PMI） 亦同樣創二○○九年六月以來最低，主要經濟數據唔多令人鼓舞。
雖然美國企業盈利今季表現唔錯，但為咗精簡成本，變相一個人做兩個人嘅工作。無錯，生產力係有所提升，但就業職位增長就會放慢。就算經濟有增長，處身失業大軍之中，好難感受到經濟成果，如果勞工市場持續疲弱，美國人對經濟增長更加難感同身受，難怪Mauldin咁重視「人人有工開」。
另外，美國上月消費物價指數（CPI）跌0.3%，雖然符合預期，但屬兩年來首次下跌，更是二○○八年十二月以來最大跌幅。剔除食品和燃油兩項必需品，美國人收入未有整體提升，消費力尚未復原，連帶消費需求都唔強，如何帶動增長，撐起整個美國經濟呢？
唔單止Mauldin睇淡，就連Bloomberg Orange Book都睇淡美國經濟前景。現在英國陷入衰退、歐元區危機沒完沒了、日本步向第三個「失落十年」、中國隨時硬着陸，美國想獨善其身都難。
WORLD 李宏博