Market Insight：聯想隨時挾淡倉

反而令市場較意外的，是調低了經濟增長預測，可見一班聯儲委員並非一臉樂觀，對未來經濟都仲係淡淡哋，美銀美林估計，QE3最快要到九月見面，規模大約5,000億美元，聯儲局的零息政策，也至少維持到一五年中旬。

股民偷步炒美國放水，昨日港股大打修正球，恒指跌253點收報19,265點，相比下，內地股市走勢更差，人民銀行減息的威力，唔及美國無放水預期厲害，昨日滬綜指在商品股拖累，加埋今日端午節假期休市，A股炒家要錢唔要貨，滬綜指跌32點收報2,260點，創兩個半月新低。

放大圖片

放大圖片

「小渾水」字字值千金

樹大招風，剛高調投得新上海地王的恒大地產（03333）被空軍隊到爆廠，本地唔算出名的「小渾水」Citron，出報告唱淡恒大，指控公司做假帳兼且資不抵債，昨日幾個投行老友，話幾間外資借貨行唔夠十點半，手上恒大已一股不剩，全日沽空股數近6,400萬股，可見基金經理都選擇寧可信其有。

恒大股價昨最多跌兩成去到3.6元，隨後當高管同投行陸續透過電話會議解畫，午後跌幅收窄，最後都跌一成一收報3.97元。一朝成名的Citron，一份57頁報告，搞到恒大市值單日蒸發77億元，簡直是字字千金。古勝好奇翻查Citron往績，又確係唱衰要比唱好的報告成績較佳。

以往，一百份大行報告，九十五份以上唱好，建議持有就已經算極為大膽，事關有得咁上下江湖地位的分析員，或多或少怕得罪管理層，輕則以後分析員會再不獲邀請，嚴重起上來，隨時累到以後凡親購併及企業融資生意都被拒之門外。

監管當局不能袖手

然而，目前市況看來實在夠差，炒落容易炒上難，愈來愈多獨立分析機構轉向專揭人瘡疤，爆公司管治問題為己任，佢哋同做淡者行得幾「埋」？無人知，基於分析機構和坐盤基金表面上並無關連，監管機構對此極少過問，作為普羅股民，好易踩地雷成為大戶點心。看來監管當局係時候考慮對上市公司有更嚴格審批及監察，莫再濫竽充數，也要為研究機構築起更嚴格防火牆，否則此風一長，對上市公司及大部分投資者都無半點益處。

恒大之外，昨日有幾隻基金股異動，東岳（00189）、東方表行（00398）、新華保險（01336）各有被質原因。最莫名其妙要數聯想（00992），股價一度急跌一成一，低位見6.66元。事緣台灣傳媒話公司管理層，準備調低全年出貨目標指引，由原來增長20至25%降至13至15%。

先不談聯想之前無作出20至25%出貨增長預測（搵番大行報告，年初已提出一三年升15至20%的指引），遑論修訂指引前向傳媒放料！股價異動又無被要求停牌發澄清，是奇中奇。

市底虛弱嚴限注碼

聯想股價今年優於大市，年初至今股價升三成一，昨日幾間大行已經向管理層證實，無計劃調低出貨量指引。

綜合預測，一三年三月底止年度市盈率15倍，對比通街單位數估值的中資股，聯想唔平，卻是少數經濟麻麻，未來兩年仲可以交到增長的選擇，單純因為唔平去睇淡，顯然理據不足。五月中開始，聯想幾乎日日錄得數千萬元沽空，昨日淡友無趁機平倉，沽空額反而逼近2億元，短期挾淡倉機會唔細，如果開7元樓下，值得一試。

呢個星期炒「七一」中央送大禮經已到咗尾水，見到券商股同一眾中資金融股率先發軟蹄，資金轉移視線冷敲低殘嘅零售股，珠寶手錶同服裝股亦有翻炒迹象，可惜都係得一、兩日貨仔，跟炒要眼明手快，輸贏都要即日計數，一過夜分分鐘貪字得個「貧」，咁嘅現象亦反映市底仍然虛弱，股友落場炒作宜嚴限注碼，量力而為！

古勝