「靈感IQ稱得上，十分之高超，創作力量同幻想，會嚇你一跳……」話時話，呢幾句歌詞都幾符合現時環球金融市場嘅情況，正如近期港股走勢咁飄忽，孖妹真係少啲投資靈感、少啲IQ都隨時中招，況且市場嘅幻想力向來豐富，最鍾意將壞消息「二次創作」，務求嚇到股市跌，散戶走。好彩孖妹喺金融界識得唔少博士級人馬，以佢哋嘅金融智慧去拆解金融危機，「易過借火」喇！
「讀萬卷書不如行萬里路」，建銀國際證券研究部董事兼首席經濟師林樵基不單止有經濟系博士嘅學歷，仲喺外國留學多年，名副其實「浸過鹹水」，難怪佢對宏觀經濟咁有心得，經常貼中內地金融政策嘅結果，因此獲得「財策預測王」之稱。
孖妹： 早前內地央行宣布減息，其實咁對市場係好事定壞事？
林： 五月份內地經濟數據轉差，令中國經濟增長下滑幅度快過預期，央行經過深思熟慮，平衡各種風險後先決定減息，希望刺激經濟活動，釋放銀行存款嚟鼓勵消費。同時央行提出利率市場化，容許金融機構靈活地根據市況嚟確定合理嘅貸款利率，除可提振資本同金融市場活動外，亦可加快金融改革嘅步伐。
孖妹： 照你估計，遲啲內地仲會唔會有其他財政策略驚喜呢？
林： 今次減息可振奮內地銀行貸款活動，隨中國GDP同比增速觸底至7.7%，固定資產投資將成為第二季內地經濟嘅主要動力，下半年則轉為國內消費，相信之後市場信心會改善，推動A股回升。我相信內地央行喺今年底前，將會再減息0.25%及下調存款準備金率（RRR）0.5%，加快放鬆貸款步伐。雖然發改委否認今年再推「泵水計劃」，但若果政府真係出錢救市，我估個刺激金額將達到1至1.5萬億元人民幣，以促進投資同內需。
孖妹： 嘩！如果內地真係「泵水」救市，港股仲唔大升？到時買咩股票好呀？
林： 現時港股有波幅、無升幅，故我唔建議大家去短炒投機，投資年期最好以半年至一年為目標，首選受惠國策嘅行業，即七大戰略性行業，再從中揀取龍頭股買入。而我就睇好科技股如騰訊（00700）、瑞聲（02018）、中興通訊（00763）；內需股方面就要買日常生活用品類，如維達（03331）、恒安（01044）。
年齡 40
現職 建銀國際證券研究部董事兼首席經濟師
綽號 財策預測王
學歷 加拿大麥基爾大學經濟系博士
有港版「末日博士」之稱嘅交銀（香港）首席經濟師羅家聰，最強善用拼圖拆解環球經濟變局，兼且以最快速度「腦筋急轉彎」解讀市場上嘅好淡因素，其獨特嘅金融見解深得市場歡迎。但話明叫「末日博士」嘛，難怪現時羅家聰睇淡港股，仲話自己過去兩年無買過股票，皆因「最壞時刻尚未到來」！
孖妹： 歐債成日出事，美國經濟唔掂，現時環球市場係投資亂世？定危中有機呀？
羅： 投機亂世似啲喎！咁歐債、豬債就梗係唔值得投資喇，但我覺得值得投資嗰啲又未算最平，港股需要時間醞釀見底，加上現時樓價高，失業率又低，股市好難喺呢個階段見底，我估最快要明年先有機會出現，但呢個跌勢途中會出現若干個底，咁我就唔知邊個先係「真底」喇。
孖妹： 投機亂世通常都滿布短線操作機會o架喎？
羅： 喺逆市做短炒投機博反彈，我嘅立場係唔反對但唔建議，但散戶要緊記，揀錯邊一定要離場，贏咗錢都要走。講真，不停咁買股換股絕對唔係投資妙法，成功嘅投資係當大市跌到谷底，而你喺個底位買到長遠有價值嘅嘢，買咗之後又唔使驚佢會受周期性因素影響股價，又唔使擔心短期波動，但又能長線跑贏。
孖妹： 咁即係揀咩板塊，或者龍頭股呀？
羅： 買股票唔係睇板塊嘅！不同政策、不同周期性因素如息口、通脹、匯率、GDP都會對不同行業嘅股票有所影響，但現時環球經濟氣候大上大落，一個壞消息足已令全部嘢一齊跌，由此可見環球股市已經一體化，並且蓋過不少基本因素，所以揀板塊係多餘嘅！要知道樹大有枯枝，亦唔係每個行業嘅股票都係好嘢！而且揀股主要係睇前面（前景）而唔係睇後面（往績），龍頭股嘅規模係最大，但長遠而言仲有無投資前景，咁就要睇其經營生意有無潛力？管理層係咪優良人才？
年齡 35
現職 交通銀行（香港）首席經濟師
綽號 港版末日博士
學歷 城市大學經濟系博士
擁有逾廿年投資經驗嘅中信証券國際董事林一鳴，曾經研究超過一百本投資類書籍，嘗試搵出最準確預測大市嘅方法，終於佢結合埋投資心理學，整咗套「波浪理論」，從而探測「入市」同「出市」嘅投資訊號，因此被市場封為「新波浪大師」。不過，孖妹知道佢數浪功力了得外，投資樓市都極具眼光o架！
孖妹： 你嘅強項就係數波浪，咁唔知依家港股處於邊一浪呢？
林： 目前港股正處於「終極一跌」嘅途中，即熊市當中嘅C浪，喺呢個波浪跌勢中，顯示出大市尋緊底。所以我唔建議散戶喺呢個不明朗市況中入市撈底，反而手上要儲足資金，等待「終極一跌」出現後，先至入市大掃貨。
孖妹： 既然恒指「終極一跌」未出現，咁即係港股未見底喇？
林： 現時港股未到最衰嘅時候，但我可以話，恒指「離底」不遠了，仲好有可能會喺今年內見底。其實「終極一跌」係等緊市場發生一件重要嘅壞事件，例如希臘真係「脫歐」，又或者西班牙、意大利爆大鑊嘢！甚至可能係美國嗰邊出事都唔定。但投資者又唔好諗到「終極一跌」係指恒指將跌到12,000點，因為熊市唔會超過一年，而睇番去年十月份恒指低位係16,170點，我覺得呢個係重要支持位，亦係今年可以見到嘅一個底部。
孖妹： 咁我哋要以「不變應萬變之心」，等「終極一跌」喇！
林： 只要「終極一跌」出現，中國嘅財策亦會改變，屆時佢會放鬆銀根，如放寬調控內地樓市嘅力度、補貼一些日常生活類嘅內需市場。現時內房股股價已經跌得非常之殘，所以只要內地一鬆手，到時內房股就會彈升。
年齡 43
現職 中信証券國際董事
綽號 新波浪大師
學歷 中文大學財務系哲學博士
若有料報畀高妹同彩兒或有嘢問，可電郵money.biz@opg.com.hk
（高妹）（彩兒）