Million大追尋：80後模特兒炒匯未輸過

擁有葡萄牙血統的Ines，喜歡環遊世界，亦因為熱愛旅行，所以她開始了解外幣走勢，後來發現炒外幣都是有效的投資工具。

大約兩年前，當時歐洲正陷入債務危機，歐元兌港元由10元左右跌到約8元水平，「我有好多朋友都話歐元有排唔會升，所以我嗰時唔敢買，但去年歐元兌港元回升，我覺得錯失咗一個投資機會。」自此之後，Ines開始研究部分國家的政治及經濟狀況，了解匯價下跌原因，以及預測未來的升值潛力，以把握投資機會。

儲錢選人幣 歐元未跌完

Ines投資外幣為主，歐元、澳元、加幣、人民幣都是她重點留意的外幣。她認為澳元和加幣近期雖跌，但環球經濟波動對澳洲、新西蘭經濟的影響相對較細，「人民幣就係儲錢首選，未到最高點，仲有得升。」至於歐元區一波未平，一波又起，Ines表示早已賣出手上所有歐元，「希臘方面嘅問題仲未解決，隨時退出歐元區，又或者要撥款救助，歐元應該會繼續跌。」

年輕投資者總會經歷過「年少輕狂」的投資階段，但Ines直言自己是「穩陣派」，不敢涉獵高風險的股票和孖展，投資組合偏向風險和回報較低的外幣和保險基金，「外幣穩陣過股票好多，賺錢唔太多，但蝕錢都唔會太多。」每次投資，Ines都會按照自己的目標價位買入和賣出，「可能我放咗之後仲會升，但我得到我想要嘅價位，我就心滿意足。外幣通常都係升幾毫子，每宗交易賺到幾千到一萬蚊，就已經好好。」

投資如炒餸 最緊要火候

投資資歷僅兩年的Ines，至今從未損手，更獲利達六位數字，但她始終對投資未有過高期望。「投資總比將筆錢放入銀行好」，Ines笑言即使在外幣損手，「最多咪拎啲外幣去旅行。」

除了投資有道，Ines亦是識食一族。自幼食慣西餐，媽媽又是葡萄牙混血兒，Ines對葡國菜素有研究，「葡國菜出名嘅有馬介休焗薯蓉、馬介休沙律，得澳門先有葡國雞。」Ines還開blog教煮餸，又籌備出第二本烹飪書，堪稱美女廚神。她笑稱：「炒餸和炒外幣一樣，都要睇火候，買股票、外幣要睇準邊個價位入市或放售，炒餸要睇準油滾先落材料，又要睇準時間撈起。」

創業搞公司 自己做老闆

樣子甜美，身材高挑的Ines，前幾年進軍模特兒界，兩個月前更成立一間模特兒中介公司「In-model」，創一番事業。她表示，目前公司已有穩定客源，路向明朗，對前景相當有信心。她又說，做生意有別炒股票外幣，「心機、時間嘅投資比較大，亦係一項長遠投資，唔可以見到好就收，要慢慢等收成期。」

Ines亦致力發掘新人，簽新模特兒、藝人除了考眼光，更是一項風險高的投資，「無論睇人定睇股票，一樣要睇得清清楚楚，真係好重要。如果隻股票無潛力，你都唔會買啦，正如一個人唔識進步，你投資落去都無用。」

80後美女股神：王雅媛 （Victoria Wang）

有「美少女股神」之稱、現職申銀萬國證券香港聯席董事的王雅媛，幾年前從上海來到香港中大金融學系讀書，二○○七年參加7間大學舉辦中港大學生模擬投資比賽，用模擬100萬元資金投資港股，兩個月獲利20倍，將模擬股本增值至2087萬元，令她贏得比賽冠軍。大學畢業後，旋即加入香港一間證券公司工作，並快速地擢升為聯席董事，年紀輕輕已賺得人生第一桶金。

袁彌明（Erica Yuen）

二○○五年參加香港小姐競選的袁彌明，曾在美國修讀經濟，她平日不僅言行出位，其投資風格亦以快狠準見稱。袁彌明鍾情風險高的投資產品，日常主要炒金、油、外幣及期指，最近更投資100萬元於自家經營的生活百貨店，專賣健康食品、護膚品、化妝品、衣服等。