高盛集團尋日正式宣布，施瓦茨（Mark Schwartz）將重返高盛，並擔任集團副總董事長及集團亞太區董事長。施瓦茨日後將長駐北京，重新加入集團管理委員會。高盛集團董事長兼首席執行官布蘭克費恩就話，施瓦茨憑住豐富嘅經驗同人脈，將會係高盛開拓亞太區業務嘅重要王牌。呢次高盛之搵番施瓦茨回巢，實情咪係聞戰鼓思良將嗰隻囉。
施瓦茨早喺七九年嗰陣已加入高盛投資銀行部，八八年起仲做埋高盛合夥人，佢喺高盛其實都撈得幾掂，絲絲記得佢曾先後做過幾個不同嘅post，好似高盛（日本）主席，管理委員會成員同埋高盛亞洲董事長，直到○一年離職為止，全部都係高級嘅post嚟。之不過，人望高處，水望低流，施瓦茨離開高盛都係人之常情。
離開高盛，原來喺翌年，施瓦茨去咗量子基金創辦人、國際大炒家索羅斯度撈番份資深顧問，查實施瓦茨呢個姓氏，其實同索羅斯本名Gyoumirgy Schwartz姓氏係相同嘅，可謂同姓三分親，但佢老哥幫索羅斯手，都算係由低做起，不過對有料嘅人嚟講，只不過係等機會啫，結果施瓦茨喺○三年到○五年期間，已間接代替威廉．史塔克（William Stack），擔任索羅斯對沖基金管理公司（Soros Fund Management）嘅總裁及首席執行官。
之後○六年開始，施瓦茨又轉任一間綠色能源投資公司MissionPoint Capital Partners嘅董事長，同時亦係萬事達卡，日本軟銀同埋Harbor Point Limited嘅董事。