絲絲講場：張忠謀堅定iPhone迷
有「半導體之父」美譽嘅台灣積體電路公司董事長張忠謀，雖然已經80高齡，但一樣係iPhone同iPad嘅粉絲。HTC老闆王雪紅一定係收到風，所以早前推出新手機，即刻送去畀張忠謀用，諗唔到部新手機反而俘虜咗張夫人嘅心喎。
張忠謀坦言一直用蘋果公司嘅產品，而且好習慣，連太座都係佢哋嘅忠實用戶。貴為全球最大晶圓代工廠嘅舵手，張忠謀對邊樣產品捧場，就係「品質保證」喇。所以HTC唔敢怠慢，1年幾前推出第一代平板電腦嗰陣，已經搵人送去畀張忠謀，最近就送咗部新手機。
HTC送機冧掂張太
就係呢一招，用開iPhone嘅張夫人，依家都用埋HTC嘅產品。HTC係台灣品牌，亦已打響全球知名度，至於名氣唔差嘅宏碁同華碩呢？張忠謀話「佢哋冇送畀我喎……咁我梗係冇要人哋送喇，我相信各有好處嘅」。
三星已經成為全台灣高科技企業嘅公敵，大家都絞盡腦汁唔畀三星搶生意。張忠謀就語重心長咁話，蘋果公司嘅成功集齊咗好產品、產品好嘅生態環境，同埋完整嘅供應鏈三大因素。「三星喺度追，仲追得相當近」，佢都想大家快啲趕上呀。