絲絲講場：優通幸運食尾「牛」
優通（08232）尋日喺創業板掛牌，鳴鑼過後，公司同港交所（00388）互換禮物慶賀，港交所照例又送一隻水晶金箔牛畀優通做紀念。不過，唔講唔知，原來港交所依家用嚟送畀新掛牌公司嗰隻水晶金箔牛，送畀優通已經係最後一隻。優通獲贈最後一「牛」果然幸運，尋日首日掛牌逆市上升，並以高於配售價0.34元收市，收報0.355元，升4.41%。
「新牛」改用銅鑄
絲絲同優通董事長姜長青講起呢隻最後一牛，姜老闆即面現驚喜，即刻同絲絲講：「希望公司股價也很牛……牛氣沖天！」咁話。
港交所方面同絲絲講，送畀優通嗰隻水晶金箔牛確係最後一隻，所以今日另一隻新股東吳水泥（00695）上市，港交所將會送贈一隻全新設計嘅「牛」畀東吳水泥做紀念品。
呢隻「新牛」用料係銅，由本地雕塑家林可頤設計，聽講仲係港交所行政總裁李小加親自揀選。究竟「新牛」有幾靚，到時就要拭目以待。