絲絲講場：港交所狄勤思約滿後…
證監會「打虎英雄」，法規執行部執行董事施衞民九月約滿，政府會唔會同佢續約，備受市場關注外，另一位同樣做監管工作嘅港交所（00388）上市科主管狄勤思，聽聞亦於短期內約滿，究竟將屆六十歲嘅狄勤思留唔留任，外間亦非常關心。事關港交所上市科有排山倒海嘅工作正在進行，因此佢嘅去向分外惹人關注。
上市科主管除咗掌管本港金融市場最重要命脈之一嘅上市工作，對企業上市、投資者、以至中介人起舉足輕重嘅作用外，上市科依家仲有多個項目進行，多份諮詢文件準備出爐，數數手指，份清單最少包括窩輪市場監管改革、簡化海外企業來港第二上市、同上市公司中途停牌機制等等，樣樣嘢都對市場影響深遠。
曾是證監會老臣子
手頭大把嘢要搞，唔怪得市場人士咁關心佢嘅去向呢！事實上，狄勤思多年來，一直都好喜歡做市場監管工作，除了早年曾喺澳洲證監會做過外，佢亦曾係香港證監會嘅「老臣子」，做咗十幾年，由91年至05年。
之後佢亦喺基金公司做過，09年1月加入港交所，而同年嘅3月就正式接替韋思齊，出任上市科主管。
外界成日話，自港交所行政總裁李小加上任後，港交所高層「車輪轉」，今次會否打破宿命，相信不久將來就會揭曉！
余詩韻