魚缸亢奮一日後，回復所謂的「理性」，恒指昨日低開234點，收市跌幅收窄至81點，主板成交降至415億元，買賣兩閒。
市場成交唔多，但細心留意下新聞，發現唔少公司一直密密回購股份，向好方面諗，股價低過帳面值，回購當然有利股東權益，亦代表現況未能如實反映股票價值，但股民當然唔可以咁單純，就此跟進買入，因背後可以有無限咁多個動機，就好似近排個別爆出醜聞的民企，亦同樣密密做回購，以圖穩定信心，成唔成功好難講。
窩輪整體成交按日升7%至64億元，佔大市比重升至15.4%，牛熊證成交就按日跌一成，至61.1億元。萬九關前有阻力，後市方向唔多明朗，較多資金轉炒個別窩輪，滙控（00005）窩輪最活躍，成交7.3億元，佔比高至11.5%。
恒指波幅指數上周一曾飆至33.39高位後，已急速回落至30樓下，大市是升是跌，成交一樣咁奀，反映市場實際無出現一股恐慌的失控，只是一片心淡。從走勢來看，跌勢開始喘定，身邊口痕友話，負面因素都反映得八八九九，認為再跌空間有限，當大家情緒未見樂觀時，不如睇位小注牛證，恒指大和牛（69865）今年八月三十日到期，收回點數17,800點，槓桿比率14.9倍。
Handsome哥