呢排國家開始催谷股市，不斷推出財政方案，相信股市將重返正軌！投資者要掌握呢個勢頭，當然係用番同內地財金政策息息相關嘅內房股，大家話係咪？
富力地產（02777）主要業務為於中國發展優質住宅同商業物業，集團有喺北京、廣州同其他城市發展酒店、辦公大樓及商場，亦有一部分不作銷售，只用作投資。即使呢兩年中國經濟有放緩迹象，但集團一一年度盈利仍增長11.3%，可見富力喺內房股嚟講，算係幾優質同埋可以抵擋到風暴嘅公司。
富力喺華南及華西地區嘅業務增長頗佳，睇番廣州年內經濟增長更進一步，一一年國民生產總值達1.238萬億元人民幣，按年增長11%。當中更為重要嘅係人均可支配收入，增加至歷史新高34,000元人民幣。加上政府過去幾年大力投資基礎建設，舉辦了第十六屆亞洲運動會，種種舉措都令城市發展更進一步。國家投資落去嘅金錢，其實最影響嘅就係地價；鐵路、公路起好，自然會帶起房價，富力可以話係直接受惠。
富力喺廣州嘅協議銷售當中，約87%來自八個項目，其中三個項目位於珠江新城。珠江新城係集團重點打造嘅其中一個現代中心商務區，集團充分發揮呢個地域嘅潛力，仍然會繼續深化呢個項目嘅發展，相信未來會成為集團嘅中流砥柱。
睇番數據，集團市盈率只有5.14倍，繼續追蹤、出發！
香港大學電子金融服務榮譽助理教授 徐燦傑