絲絲講場：灰太狼吼中內地「盛女」
意馬國際（00585）因為製作內地大受歡迎嘅動畫《喜羊羊與灰太狼》而備受注目，可惜公司近年一直都冇盈利，而今年更加爆出前CEO蘇思偉辭職呢單負面新聞，尋日佢哋舉行一年一度嘅股東大會，新任行政總裁戎子江（Steven）亦都係首次同大家見面，咁絲絲就去八吓，聽吓佢講公司最新發展啦。
新任CEO落力宣傳
Steven雖然上任CEO呢個位三個月唔夠，不過對公司策略都好熟悉，仲好積極咁去宣傳公司嘅新戲，簡直係夠晒盡責；事關講起未來大計時，佢就提到公司今年會上映一套叫做《我愛灰太狼》嘅真人動畫混合電影，而目標竟然係內地嘅「盛女」市場！
「盛女」都睇動畫？Steven就解釋話，因為灰太狼呢個角色喺動畫入面任勞任怨、聽晒老婆話嘅形象深入人心，好似如果搵唔到羊畀一家大細食，就會畀狼老婆用平底鑊打，所以內地觀眾都認為佢係難得嘅好男人，仲作咗句「做人要做懶羊羊，嫁人要嫁灰太狼」嚟表揚佢，絕對係一眾「盛女」嘅理想丈夫！