絲絲講場：籃球場上滙豐奪冠
第七屆「金融精英盃」籃球總決賽喺上周日圓滿結束，今年滙豐銀行憑42分贏走冠軍盃，而由香港專業財經分析及評論家協會組成嘅「狂牛隊」就只能以35分屈居亞軍，另外恒生（00011）就拎到季軍。
身為搞手兼狂牛隊隊長嘅靈獅控股董事總經理藺常念就話：「因為狂牛隊有個6呎6吋高嘅中鋒受咗傷，所以今年場波打得好辛苦，依家拎到亞軍，都算係雖敗猶榮喇。」
花旗首加入得第四
藺常念又笑言，打籃球賽無個高佬坐鎮真係輸蝕好多，所以之後一定會喺金融圈內物色高佬，然後誠邀佢加入，以增強狂牛隊嘅實力喎！
好！等絲絲同大家報吓上周日比賽嘅成績先，「滙豐隊」以42分比35分贏咗「狂牛隊」成為冠軍；而今年新加入比賽嘅花旗銀行，實力亦非同小可，同「恒生隊」激戰一輪後，最尾以35分比51分輸咗，只能拎個第四名。不過，藺常念講明「金融精英盃」長搞長有，所以各個隊伍繼續努力，明年再喺籃球場上鬥過喇！
余詩韻