孖妹S檔案：散戶疑難逐一破解

郭：耀才證券市務總監郭思治

蔡：蔡小姐

蔡小姐	嬌姐	黃先生

嬌：嬌姐

黃：黃先生

Q1.大市方向如何？

蔡：近期真係一個仙都賺唔到，就快被恒指玩殘！依家個市升吓跌吓，好似無乜方向，我剛剛去完投資講座，講者就話個市會升到19,000點水平後回落，都唔知真定假！

郭：縱使上周中央放水，減息四分一厘，但對大市的刺激作用不大。因市場氣氛仍受歐債所牽絆，將直接影響投資者的入市心態及大市的資金流，致令市場充斥不明朗因素。恒指仍會反覆向下，大有機會下試去年十二月低位18,026點。不過，歐洲央行大有機會推出量化寬鬆政策，藉由印銀紙去解決歐債問題，將為金融市場帶來曙光，帶動港股走出谷底。

Q2.港股會否出現終極一跌？

嬌：大市立立亂，我就心慌慌！所以我把心一橫，現已沽晒手上啲貨，恐防恒指大瀉呀！

郭：近期大市出現的調整，無非由歐債升溫所引發，儘管市場仍充斥不明朗因素，但投資者已有心理準備，並不會出現恐慌性拋售。相反，他們已做好風險管理，並不存有沽貨的迫切性，所以恒指不會下跌至太低水平，只會出現零碎的沽壓情況。除非出現特別利淡的因素，令到投資者防不勝防，否則出現終極一跌的機會較微。

Q3.現是撈貨時機嗎？

嬌：我哋日日望住個市，望到心都寒晒，都唔知道恒指幾時先見底！不過，好彩我份人比較樂觀，惟有認為現是黎明前的黑暗，是趁低吸納的撈貨時機！

郭：大市在下試低位，雖仍有下行風險，但藍籌股的市盈率平均只得九倍，屬超值水平！大多市民均冀望可捕捉大市低位，惟大市低位往往難以預料！因此，如果散戶無懼近期的市況波動，現可分段買入撈貨o架啦！

Q4.港股何時才展現升浪？

嬌：依家個市跌又跌得多，升又升唔定，搞到我唔敢追貨呀！

郭：當外圍市況稍為喘定，歐債問題有正面的解決方案，資金便會回流，港股跌勢亦會休止o架喇！由於市場的流動性資金仍多，投資者手上並不是無錢，而係唔敢入市，所以當歐債引發的不明朗因素告一段落之後，資金便可回流港股並展現升浪o架喇，屆時要升回今年高位21,680點並不困難，甚至可較為積極地上望23,000點至24,000點呀！

Q5.甚麼股份值得低吸？

蔡：今時唔同往日喇！我以前買咩都賺錢，依家就買咩都蝕錢，辛辛苦苦賺番嚟嘅錢都輸番畀市場，搞到心都淡晒，唔知買咩先好！

郭：若然大市重上21,000水平，甚麼股份可率先追上？當然係重磅藍籌股啦！滙控（00005）、中移（00941）及建行（00939）佔恒指約31%，如果恒指上升，呢幾隻股份一定會做好！不過重磅藍籌股為數不少，散戶如不知該如何選擇，大可買入盈富基金（02800），主力追蹤恒指變幅！

此外，內房股將可受惠於貨幣寬鬆政策，加上人行上周宣布減息四分一厘，減輕人民買樓成本，有利內房股前景，特別係中國海外（00688）及華潤置地（01109）！另水泥股也可看高一線，因中央為保持國內經濟增長，定促進高鐵相關活動，屆時安徽海螺（00914）、華潤水泥（01313）、中國建材（03323）等水泥股便可受惠！

Q6.手上的蟹貨，應如何處置？

蔡：我依家持有唔少蟹貨，就快可裝滿兩個大貨櫃喇！股價有跌無升，搞到我好多股票都要蝕幾萬蚊，現在惟有攬住啲蟹貨等升市！

郭：其實要睇吓大家手上的蟹貨係咩喇，如果係優質股，大可持盈保泰，因已過止蝕的最佳水平！不過若是手持二、三線股或民企股，大可趁優質股處於低價時以貨換貨呀！

Q7.新股仲抵抽嗎？

蔡：我不嬲都鍾意抽新股．但近來唔少新股集資過後便潛水，令人相當氣憤呀！

郭：不少新股的業績表現均未能符合市場預期，以致上市後就立即潛咗水，難以給予投資者信心，所以，應以觀望為主，唔好隨便去抽新股！

Q8.內銀股仲值得買嗎？

黃：港人不嬲都鍾意炒內銀股，但我一早就放晒出去啦！雖然中央頻頻放水有利內銀股，但若果內地通脹升溫，中央又會收緊銀根o架啦，所以我都唔敢買內銀股！

郭：人行的減息政策應對內銀股的刺激不大，但不論是國有銀行或是內地商業銀行，其估值皆處於吸引水平！中行（03988）是超值之選，其市盈率最低但息率卻最高，另工行（01398）最為賺錢，而建行則獨佔恒指7.98%，大有機會跟隨恒指展開升浪。所以，投資者的資金若有限，可先選擇此三隻內銀股！

Q9.點先可以忍手離場，暫且停賽？

黃：呢兩個月恒指跌咗唔少落嚟，好多散戶都會身痕入市短炒，點知卻唔夠股市玩而輸錢，所以我經常都提醒自己唔好亂入市o架！

郭：如果股民主要睇中長線並分注買入，根本就唔需要擔心短期的波幅。然而好多短線炒家總在個市下跌時，忍唔住入貨博反彈，誰不知股價仲有得跌呢！所以投資者要忍手離場便要靠自身的能耐！

Q10.怎可與大戶鬥法？

黃：大市由大戶操縱，他們財雄勢大，我哋只可任人魚肉，成為大戶手上的點心，因此我盡量減少買賣次數，以免上得山多終遇虎！

郭：散戶確難憑一己力量與大戶抗衡，只可順勢而行！若大戶蓄意做淡，我們大可翹埋雙手等個跌勢去得七七八八之時，才攝番隻手去作部署，趁低吸納股份！不過投資者要留意大戶沽出的股票孰優孰劣，低吸良機只可應用在優質成分股！反之，若是細價股的話，則大有機會愈跌愈低，不宜低追！

若有料報畀高妹同彩兒或有嘢問，可電郵money.biz@opg.com.hk