信德集團（00242）早前供股，畀碎股黨惡搞，佢哋可能見今年股東人數大增，將股東大會由往年上環信德中心改去無雷公咁遠嘅機場天際萬豪酒店，以為地方大啲，股東舒服啲，不過，小股東似乎唔多「領情」，仲呻「連車錢都蝕埋」。
絲絲都有去湊熱鬧，現場所見，去股東會嘅股東唔算多，公司係咪高估咗出席股東會嘅股東數目呀！絲絲真係冇估錯，因為連集團自己友都話「無想像中咁多人」。梗係啦，碎股黨只係想趁機平價供多啲股，邊有咁神心去股東會呀！
近年小股東嘅「維權」意識高漲，少啲食物都會向酒店或者公司投訴，絲絲見信德都有向每位股東派發一盒小食拎走，可惜有小股東就話，得兩三件「撻」，「真係連車錢都蝕埋」。
唔單只投訴公司「小家」，小股東話接駁巴士都唔夠。天際萬豪酒店雖然有大巴接載小股東，但就車到東涌地鐵站即止，無私家車嘅小股東就要辛苦少少，皆因尋日股東會喺三點半開，離開嘅時候撞正放工時間，有乜辦法唔畀小股東彈安排失當，真係浪費時間，車錢都蝕埋。