台灣要開徵《證券交易所得稅》嘅紛爭已經擾攘咗3個月，連財長都落埋台，眼見各界嘈嚟嘈去，好似唔將班有錢人砌低就唔痛快咁，身為富人一分子嘅鴻海董事長郭台銘，就幫政府度咗條橋，唔使再煩證所稅，索性徵收「富人版所得稅」就夠。
郭台銘喺召開名為「早日結束無謂紛爭，全民一起拚經濟！」嘅記者會前，講咗佢嘅新稅版本。只要對全台灣前300名有錢佬增加所得稅，政府每年就會多180億元新台幣嘅稅收。到景氣好轉可以停止徵收。
聽落好似巴菲特提倡開徵嘅富人稅，先兩日至有人感嘆要搵「台灣巴菲特」，郭台銘一聽即刻劃清界線。佢話台灣唔係冇巴菲特，但台灣要嘅係企業家，對經濟發展同社會有貢獻嗰種。「巴菲特係一個炒股票賺錢做慈善嘅名人，我哋冇辦法，亦唔願意，更加唔需要去學習。」
郭台銘好肯定咁話，相信99%嘅人都想紛爭快啲結束，齊齊解決經濟危機。「我連身家都可以捐，點會怕畀多啲稅？更何況有錢佬稅，我絕對唔係第1名，話唔定100名以外添。」