依家個市似「藥煲」，指數跌兼成交少，中小經紀經營環境百上加斤，無啖好食，但「點都要食飯o架」，今日班經紀就連走兩場飯局，日頭要出席聯交所歷屆理事聯誼會搞嘅候任特首CY嘅飯局，夜晚就要去金融服務界聯歡晚會，分別在於前者係AA制（各自畀錢），後者就唔使「科水」有人請。
其實，兩場飯局性質都好唔同。Lunch嗰餐係由聯交所歷屆理事聯誼會做搞手，李業廣係聯交所歷屆理事聯誼會主席。今次飯局將筵開九圍，中午12點一收市就「開波」。咁又係，難得同候任特首見面，仲唔把握時間向佢吐苦水，呻吓中小經紀「吊鹽水」嘅慘況，仲可以趁機反對「期指夜市」！
夜晚就輕鬆得多，飯局「牌頭」係金融服務界聯歡晚會，大家食吓飯、吹吓水、唱吓歌仔，仲筵開四十圍咁多，本港九大經紀團體齊齊參與，就連久違嘅港交所前行政總裁周文耀都被邀請出席派對。證券經紀一向都同周文耀關係好好，經紀覺得佢做港交所CEO時有商有量，連佢退休後都好掛住佢！
絲絲就好奇，證券界一向唔係七大會嘅咩，點解無端端多咗兩大嘅？原來係加埋證券及期貨從業員工會、同金銀業貿易場。今晚場面唔墟冚就怪！
九月立法會選舉就快殺到，呢場金融服務界聯歡晚會自然令人聯想到係咪同此有關？主持人就話絲絲諗多咗。絲絲最近收到風，金融服務界開始有人準備挑戰現任議員，角逐席位，正刺探緊經紀口氣，若某人出選，經紀會唔會反對。睇嚟，即將來臨嘅選戰風雲，大家有好戲睇！
余詩韻