外圍無新壞消息，港股乘機回補周一下跌裂口，恒指昨日高開90點後，買盤追入，尾段升幅擴大，以全日高位低一點的18,520點收市，收復5日移動平均線，主板成交增至460億元。
除淨後即月期指轉高水，看來淡友在萬八邊無意殺落，但成交始終偏低，脫不掉乾挾意味，開好倉都是以短線為目標，淡倉不宜大注。
身邊不少股友都問五窮六絕的股市，係咪七月就可以翻身，筆者真係答唔到咁深奧的問題。
不過，索羅斯最近發表有關歐洲危機文章，套用了經濟理論或反經濟理論的睇法，話希臘唔會離開歐元區，未來的歐洲會成為德國帝國，篇文章有幾準，唔到時候都唔知，但索羅斯擅長運用非傳統投資方法，長短倉兼備的做法，雖不是次次成功，但贏的比輸的多，都唔簡單。去了解其背後的哲學，有時比單了解其投資技術更重要。
說回輪場，窩輪成交繼續跑贏牛熊證，全日錄得72.18億元成交額，按日增3.4%，牛熊證成交只有68.44億元。滙豐控股（00005）及中移（00941）是最多人氣的個股窩輪，成交佔比分別是11.33%及7.76%，兩隻權重股昨日均彈升逾2%。
弱勢水泥股，昨日普遍有反彈，力度不算強，龍頭之一的安徽海螺水泥（00914）升1.7%，收報22.95元，今年預測市盈率10倍。瑞銀就內地水泥市場於月初出報告，指部分地區的水泥價格已在上升，估計海螺第二季基本盈利可按季輕微改善。股份22元支持力不弱，可留意其輕微價外輪，海螺瑞信購（18530）今年九月二十八日到期，行使價25.9元，實際槓桿6.6倍。
Handsome哥