Market Insight：龍源有條件反彈

明晚歐洲國家盃開鑼，各歐元區領袖摸住酒杯底睇吓波，會唔會容易啲解決當前危機？今次賽程吊詭之處係，五隻歐豬通通殺入決賽周，但係奪標次熱門，也是歐債危機救世主的德國，分組賽期間，只會和同組唯一歐豬葡萄牙碰頭，直到本月廿二日，歐盟財長會議完結先開始八強賽。試想，一旦德國之前同希臘或者西班牙交手，又咁唔好彩被擊敗，超級球迷默克爾塊面肯定黑過玄壇（唔信可以睇睇網上廣傳，上次車仔殺敗拜仁時嘅官相），仲邊有興趣同你傾財政援助。

中國商務部昨日公布，上星期內地農產品價格，連續五周下跌，生產資料價格更連續第七個星期回落，街外預測，周六公布的五月內地通脹數據會由3.4%進一步回落到3.2%，分析員都估內地通脹一旦低於3%的安全線，人行將有更大誘因，開始減息刺激經濟。

放大圖片

放大圖片

買領匯勝揸iBond

港股連續第二日反彈，恒指升261點報18,520點，外圍對全球央行救市的預期升溫，支持大市回穩，但升勢主要由補淡倉買盤支持，據賓架消息鮮見基金有新資金入市，塘水滾塘魚下，主板成交得460億元，對比上周的四日跌市，介乎517至765億元低一截，升市成交縮，市底似暗藏殺機，六月中之前，博反彈只宜大大聲細細注。

市民鬧得愈勁，基金經理愈叫好，派成績表的領匯（00823），去年可分派收入升19%，期內，零售物業及停車場租金升幅分別10.8%及11.6%，使物業收入淨額41.8億元升14.8%，投資物業估值總額766.7億元則有13.9%增長，估值上升主要是租值上升，皆因有新項目南豐廣場及海悅豪園納入所致。

全年每基金單位分派129.52仙，比市場預測中位數126.8仙多2.1%，昨日領匯升4.2%報30.85元，往績息率4.2厘，今年租金加幅放緩但不難有4.4至4.5厘，吸引力會比iBond（04214）大。

市盈率已見吸引

中國龍頭風力公司龍源電力（00916），公布五月發電量按年升7%，其中風電及再生能源發電升12.2%及302%，火電則減少3%。營運數字不過不失，可是龍源股價有迹象在4.45元營造圓底，尤其市場預期內地電力需求，可能上半年見底，近期電力股比大市更早見死貓彈。

上個月龍源跳崖式由6元邊隊到散晒，一來，本身首季業績增長有放緩迹象，不過更致命是比市場規模更大的配股的消息，公司準備批最多13.55億H股集資80億元，流通量大增五成的恐懼，加上基金相信市況咁差，低位接貨可能要幾多有幾多，索性先沽等買。不過，落到4.81元，假設批股數目不變，最多集資額65.1億元，姑勿論公司選擇等股價反應，抑或縮減集資額，消息一出之後插近兩成，已充分反映不利因素，不足10倍市盈率，亦比幾隻傳統火電股抵博，似乎彈上5.5至5.8元的機會存在，不妨留意。

金價自上周五創三年單日最大升幅後，未見有大幅回吐，現貨金價昨報1,636美元。歐債危機沒完沒了，加上最近美國經濟數據顯示復甦動力不足，內地經濟增長又持續放緩，似乎大戶開始調整策略，賭嚟緊各國政府會再開印鈔機鬥印銀紙。只係唔排除再開大水喉效用會唔會一次比一次低，且有可能做成資產泡沫。要對抗通脹，金價重展升勢只係時間問題。

黃金ETF諗得過

金價止跌回升，促使近日金礦股大反擊，招金礦業（01818）同紫金（02899）股價連日做好，摩笛亦趁熱鬧加入唱好行列。論盈利能力同管治水平，在下認為招金喺金礦股首選嘅睇法冇咩異議。之不過，除咗金價走勢之外，金礦營運同銷售存在很多其他因素足以影響股價表現，若然唔想承擔呢啲風險，可考慮直接選擇黃金ETF，如SPDR金ETF（02840）同價值黃金ETF（03081），論交投前者較為活躍。

古勝