倫敦奧運就嚟到，李宏博最鍾意睇追求速度的賽跑。本來各國互相比併經濟增長就好似奧運賽跑咁有睇頭，但在歐債危機升級後，美國、歐洲、新興市場都好似食咗軟骨散咁，個個都跑唔郁，今鋪真係大劑。
李宏博絕無半點誇張，美國勞工部公布，五月份非農業新增職位只有6.9萬個，但失業率卻回升到8.2%，美國經濟更有可能陷入滯脹。歐元區17國的三、四月失業率更創新高升至11%，西、法、意、葡等國無一幸免。別提歐元區五月製造業PMI（採購經理人指數）創3年來新低，就連增長潛力被睇高一線的中國，上月PMI也大幅回落，不少新興市場也面臨資金撤出避險的影響。
全球經濟「紅燈」一亮，投資者即時雞飛狗跳，就好似坐滿人嘅戲院火燭，火警鐘一響，大家仲唔爭先恐後奪門逃走咩，「命仔緊要嘛！」難怪投資者依家對避險工具實行「有殺錯，冇放過」。
太平洋投資管理（PIMCO）行政總裁埃利安話，目前世界各國的經濟、金融、政治、社會因素太唔明朗，投資者都係買入避險資產最實際。其實不少投資者已經把資金轉移到避險天堂─美國國債，美國十年期國債孳息率跌至1.46厘，破晒紀錄，德國、日本國家債券均出現資金湧入的情況，德國兩年期國債收益率驚現負0.012%、日本十年期國債收益率亦跌至0.81%，創9年來新低。
埃利安話，市場正重估全球債券、商品、外匯及證券的價值，面對未來的金融亂局，各類資產估值將難免分道揚鑣一段時間，意味低風險資產價值將高處未算高，高風險的資產卻低到你唔信。
最抵死嘅還是最後呢一句，市場人士聽後或會發出會心微笑，佢話現時投資者不應單單擔心投資無回報（return on the money），還應擔心投資隨時付諸東流（return of the money）。
WORLD 李宏博