「商品大王」羅傑斯冇耐之前講過，第日會有更多人購買農場同埋投資商品，估唔到真係咁快有人「和應」，而且仲係大家熟悉嘅「賺錢之神」普爾遜！絲絲聽人講，普爾遜斥資4,900萬美元（約3.82億港元）喺美國科羅拉多州一處叫阿斯彭嘅地方，買咗一個名為哈拉嘅牧場，而且仲包埋一間大別墅同附近一個細牧場添，而個賣家仲係沙地王子班達爾！
千祈唔好睇小呢個哈拉牧場呀，佢佔地面積達90英畝，喺○六年嗰時標價賣1.35億美元，係當時美國最貴嘅物業，連同嗰個細啲、佔地面積38英畝嘅牧場，有專家估計喺○六或○七年賣超過1.5億美元o架！你話今次普爾遜仲唔係執到平貨？
至於間別墅，有15間睡房同16間浴室，面積有成5.6萬平方呎咁多！仲配備有污水處理系統、加油站同埋其他高科技設備添。
聽講普爾遜打算將嗰兩個牧場升級，但就將棟別墅縮小喎，而且將牧場個名由哈拉改為Star，咁係因為個牧場位於阿斯彭入面一個叫Starwood嘅地區。其實普爾遜呢廿幾年嚟一直都有同佢屋企人喺阿斯彭度假，佢之所以買呢個牧場，係睇中佢廣闊嘅面積，仲種滿楊樹同松樹，計劃將嗰度打造成佢嘅度假屋，仲做埋農場業務添。普爾遜寓工作於娛樂，真係識歎啊！