金融海嘯後，華爾街班CEO好似過街老鼠咁，畀公眾炮轟人工太高，順吓民意減薪一兩年，依家佢哋人工又加番唔少喇。不過據《彭博市場雜誌》七月刊話，上年華爾街大行嘅打工皇帝就唔屬於海嘯罪魁，佢係私募基金KKR創辦人兼聯席行政總裁克拉維斯，上年逗咗3,000萬美元（約2.34億港元）。
亞軍又係KKR包辦，係佢表弟、聯席行政總裁羅伯茨，袋走2,990萬美元。以銀行家嚟講，最高薪嘅係近排「倫敦鯨」醜聞纏身嘅摩通舵手戴蒙，袋咗2,300萬美元。
海嘯過後，美國大行難復往年勇，收入、盈利少咗，股價又係咁跌，但華爾街CEO去年人工仲有得增長20%。從佢哋上年嘅人工，同過去三年股價回報比較，最「唔抵用」嘅CEO係花旗嘅潘迪特，佢上年份糧早就畀班股東否決，家陣重新審議緊。最「抵用」就係年薪從來只係六位數字嘅股神巴菲特，因為巴郡擁有金融業務，所以喺呢個調查亦被歸類為金融業。
即使佢哋上年薪酬增幅小過一○年嘅26%，但Hugh Johnson Advisors基金經理約翰遜認為，華爾街舵手薪酬普遍過高，董事局喺敲定佢哋薪酬前，應該多加考慮股價表現。