Market Insight：中信泰富時不與我

共富貴容易共閉翳難，德國經濟漸見自身難保，除PMI外，四月製造業定單都比預期差，跌幅由三月2.7%擴大到四月3.8%，碰啱成班窮兄弟排住隊響門口等開飯，從隔晚總理默克爾言論，市場揣測就發共同債券立場有軟化迹象。

殊不知，德財長朔伊布勒立即出來把關，話歐元要先建立真正財政聯盟，債務共擔方案先有得傾。言下之意，未來歐豬兄弟難免要將部分財政主權交出，德國先肯包底發債。由此推斷，月中希臘國會選舉，變相為脫歐公決前，歐洲央行有石破天驚救市措施機會唔大。

放大圖片

放大圖片

港股彈唔起，恒指昨日升得73點報18,259點，主板成交縮到不足400億元，唔單止基金買賣少，近排連大行報告都少，大家恍如日日等運到，唯一可以安慰係，大市沽空佔成交比例縮水跌至8.5%，乃過去一個月最低，多少反映連淡友在逼近萬八關口，亦唔想再加注做淡，尚幸歐國盃就快開波，愛睇波的股友總算有事可做。

買iBond好過放銀行

iBond開始認購申請，身邊唔少朋友都有問古勝，股市無嘢炒，應唔應該入番幾手收息。查實，內地通脹由去年高位6.5%，跌到四月的3.4%，估計周末出籠的五月數字，有可能低過3%，隨着內地供港糧食價格回落，加上零售市道近期明顯受內地經濟影響，由熱轉冷，如果新一批iBond，有港府預測全年通脹3.5%的等值回報，看來已屬樂觀。

對比紅簿仔息，估計有2至3%回報的iBond，對大部分抗拒股市風險、習慣將錢存入銀行的普羅大眾，的確是穩賺不賠的好選擇。不過，古勝賭徒性格，對佢興趣唔大，主要建基買iBond等同賭博較高的通脹，才會有較好回報，萬一香港通脹真係升溫，最大機會的誘因，不外美國推QE3，狂印銀紙推高全球通脹，或者內地經濟復甦帶動通脹拗腰再回升，兩個因素一旦出現，股市表現勢必好過債市。如果樂觀成咁，又未必會咁安份守己走去買iBond喇。

中國及歐洲央行在減息行動上歎慢板，勢估唔到，澳洲出手仲快，昨減息四分一厘，由去年十月至今，基準利率由4.75厘減至3.5厘，市場估計下月至少再減息四分一厘。澳洲經濟一直依靠天然資源出口，尤其煤炭及鐵礦石，今日歐洲經濟一池死水，大買家中國製造業需求都開始萎縮，走資源經濟的澳洲都受牽連。

高頻減息救經濟，不期然令人想到幾年前炒燶外匯，準備靠澳洲鐵礦石生意東山再起的中信泰富（00267），確實時不我與。近期，內地需求放緩，山東鐵礦石價已由二月累積跌一成三，兼仲未有見底迹象，高盛早前先對中信泰富西澳鐵礦石項目，投產日期及成本預算表示關注，基於睇唔通揸錢乃股市金科玉律，其股價由二月中高位15.88元，至今累跌三成一。

基本上，其股價與鐵礦石、中國放水消息掛鈎，上星期誤傳2萬億人仔救市，中信泰富彈上12元樓上，可惜升勢無以為繼。十年來，除炒燶匯一役，○九年海嘯及去年下半年歐債危機，市帳率跌到0.52至0.55倍之間，目前為0.58倍，開始進入可以博反彈的範圍，但大前提是，閣下要深信中國經濟及天然資源需求，於不日出現的放水行動後，仲有得救。

環顧內需板塊，無論係大股、細股，從事百貨、體育用品、食品抑或啤酒，股價都不斷尋底。就如國美電器（00493），股價低處未算低，昨日收報1.05元，分分鐘變毫子股。再睇從事消費及啤酒業務嘅華創（00291），股價昨創52周低位22.2元，市盈率得番18倍。另曾經係基金愛股嘅雨潤食品（01068），喺行頭叫做手執牛耳，股價得7.66元，有大行睇6.9元，相等於市盈率唔到7倍。

嘟QR碼行情全面睇

在下認為，除咗因為中國股票估值被下調之外，大市已由高位回落三千點有多，市場上估值唔係低到估唔落手，兼且有流通量讓大戶減持套現的，非內需板塊莫屬。黎明前嘅黑暗往往係最難頂，如今只望魚缸距離重光之日不遠！

古勝有好介紹，為了向讀者提供更多優質服務，《東方產經》已將部分股市行情版的資訊放到手機版網頁上，讀者可以用智能手機的閱讀QR編碼應用程式，掃描刊於行情表內的QR編碼，快速進入相關網頁，瀏覽包括派息備忘、沽空紀錄、大手成交等行情資訊，讀者可掃描在古勝專欄內的QR編碼，查閱港股二十大升跌及成交的即市資訊，緊貼市場脈搏。

古勝