金占士觸覺敏銳，特別留意大機構人事變動，因為當中涉及好多布局藝術。工行（01398）尋日公布咗個人事變動，望落似舊聞，實情係新變動。
工行嘅通告話，喺二月份已經投票通過委任柯清輝做獨立非執董，而公司喺五月嘅最後一日，收到中證監嘅批文。通告又話，根據法規同公司章程，梁錦松唔再擔任該行董事職務。金占士追查番，唔見工行過往有通告話梁生個位，會由柯清輝替代。
梁錦松可以話係工行嘅老臣子，佢○五年十月開始做工行嘅董事，當時工行都未上市。工行喺○六年上市，佢嘅身份係非執董，工行嘅招股文件，清楚交代佢由八十年代開始嘅工作經驗。大家都知梁錦松做過兩年財爺，因為加稅前偷步買車而落台。其實，佢之後嘅發展都唔錯，依家仲做緊黑石嘅亞太區主席。
今次調動可能係正常人事更替，不過依家香港政府架構重整緊，有好多同金融有關嘅位都未搵到人坐，如果有人估梁錦松會幫政府，做佢熟悉嘅嘢，都未必錯得晒。
金占士