絲絲講場：賀女王登基LME爭奪休戰
「英女王」伊利沙伯二世登基六十周年，泰晤士河上罕見出現千船巡遊，舉國歡騰，但勢估唔到呢單嘢竟然牽涉到港交所（00388）收購倫敦金屬交易所（LME）事！點解咁講？話說為咗慶祝香港前「事頭婆」登基周年紀念，英國尋日同今日都全國放假，連埋上個禮拜六同周日，即係連放四日假，LME收購戰都要被迫暫時「休戰」，乜都等放完假返嚟至再講。
港交所股價險失「紅底」
自從上個禮拜四LME董事局聽過港交所同洲際交易所（ICE）嘅推介後，LME決定更改「劇本」，要兩個準買家提交新一輪建議書，講白啲，無非都係想佢哋「加吓價」。咁啱，遇上英女王嘅「大日子」，LME自然要讓路，提交新建議書嘅限期訂喺今個禮拜四或之前。
由於呢幾日英國放假，聽聞早前特登飛咗去倫敦出席推介會嘅港交所行政總裁李小加都返咗嚟香港，好好再部署點樣「玩呢盤棋」！
不過，港交所可能要提高LME嘅收購價，再加上大市氣氛差影響，港交所股價尋日插水，險守「紅底股」關口，收報101.5元。
一直鍾情港交所嘅恒豐證券董事總經理張華峰，亦睇得LME呢單嘢好「肉緊」，話要知道港交所係咪真係成功收購LME、用甚麼價收購，至決定點樣處理手上餘下持有嘅港交所股票！
余詩韻