Market Insight：港交所「貴」得冇道理

早前財政部公布，頭四個月國有企業累計實現利潤6,690億元人民幣，按年跌8.6%，四月比三月按月都要跌0.5%，是國企連續三個月出現倒退，國企賺錢能力受宏觀經濟影響，持續下滑，有人擔心低PE國企股，在一二年業績塵埃落定之後，會頓時變番高PE股，市場焦點集中在中央幾時再有提振措施出台，冀望國企業績在年中至年底前拗腰向上。

俗語話生意淡薄不如賭博，但主攻內地客的澳門博彩業，昨日公布五月份博彩數據，在在證明實情係生意淡薄，無銀賭博。即使有五月黃金周之助，澳門博彩收入得7.3%增長至260.8億澳門幣，增幅創三年新低，同四月份22%相比，唔見咗三分之二。

放大圖片

放大圖片

生意淡薄無銀賭博

消息一出濠賭股跌個一仆一碌。事實上，四月之前走勢一直優於大市的濠賭股，有迹象失卻頂上光環，強如剛選入藍籌的金沙中國（01928），四月中高位33.05元至昨日24.6元，累積跌近兩成五，跌幅比恒指有過之而無不及，常言道，強勢股開始洗倉乃大市即將見底先兆，且看今次又靈唔靈？

要數最失望藍籌，一定是港交所（00388），話就話黑池等場外交易商有唔少挑戰，但幾年來基本上，無影響獨市生意特質，股市逆境時盈利跟隨大市成交額倒退，食得鹹魚抵得渴的捧場客，大抵有心理準備，近日競購倫敦金屬交易所（LME），老實講街外叫好嘅人唔多，五月初公布向LME提親以來，港交所股價跌近兩成，市值蒸發260億元，呢宗12億英鎊的交易，代價真係唔細。

昨日港交所股價跌5.1元報101.5元，同去年歐債危機時造出的三年低位99.15元近在咫尺，全因市場傳出進入最後兩強的港交所及美國洲際交易所（ICE），可能仲要提價博LME對合併首肯，包括一大堆阻礙未來提升LME盈利能力的「不平等條約」，好似倫敦總部地址、董事會及現行金屬價格交易系統均維持現狀。

收購未成先受內傷

或者有陰謀論者認為，收購着眼於長遠中港市場融合的目標，為內地金融市場進軍環球金屬交易作跳板角色，更不能排除一旦收購落實，有策略股東入股，收購所需隨時不假外求。不過，事實擺在眼前，LME這百年老號，一○年度成績表只係賺950萬英鎊，大約1.14億港元左右，港交所點以百倍估值收購，在有效將LME進一步商業化之前，業績難免被攤薄，而近期港股日均成交跌到唔夠550億元，無論收購交易或者基本因素，港交所可謂兩面不討好，古勝認為較安全做法，當然係等收購消息落實，即使已持有的，也毋須急於入市溝貨。

全球魚缸反白眼，連祖國魚缸亦唔例外，昨日滬綜指以接近全日低位2,308點收市，跌幅2.7%，一下插穿了10日及20日線，且失守五月份低位，走勢極之難睇。A股展開新一輪跌勢，次季內險股投資收益翻身無望，股價全線潛水，仲有咁低時潛咁低，中國太平（00966）跌9.4%、中國財險（02328）跌7.1%、國壽（02628）、平保（02318）同中國太保（02601）跌幅介乎4至5%。

阿爺救市出手要快

內銀股亦唔好得去邊，據講五大行自查貸款報告已上報監管機構，有冇手尾就要放長雙眼等睇戲。環顧交行（03328）、中信行（00998）、中行（03988）及重農行（03618）市帳率跌到得番0.8至0.9倍。究竟內銀咩位先至係合理值，真係難講。上月空軍瞄準建行（00939）出擊，睇怕尚餘幾家內銀考驗市帳率1倍支持只係遲早問題！

睇見內銀同內險都處於半死狀態，內房、基建、汽車、家電彈完一浸就無晒影，魚缸蟹貨層層累積，除非阿爺快刀斬亂麻宣布減息兼放鬆宏調，否則咁落去真係難以估底！

古勝