據統計，內地多達85%嘅股票帳戶，流通市值喺10萬元（人民幣‧下同）以下，如果擴大到50萬元戶，比例仲會超過97%，《人民日報》感慨股市已成為散戶嘅「集中營」。咁有錢人都唔玩股票咩？唔係絕對，但大部分嘅錢都分散去更安全嘅地方，有人淨係買信託產品同國債，一年穩袋300萬，咁又「何必炒股呢」？
有專家形容A股市場本身就係一個「散戶市」，成個金字塔咁，塔底係「小散」，塔尖就係「大戶」。當然，A股經常處於熊市而睇唔到盡頭，啲有錢人梗係散水喇，因為佢哋最重視安全，A股風險咁大，都係離遠啲好。
有私人銀行理財顧問話，身家愈雄厚嘅投資者，對股票嘅興趣就愈細。但凡只揸住100萬元左右嘅人，都好熱衷股票；當身家喺1,000萬到5,000萬元嘅時候，股票佔財富嘅比例大約係20%。再有錢啲嘅，幾乎唔買股票嘞。
有個身家豐厚嘅資深投資者話，十年前仲會買股票，但回報唔理想，依家二級市場冇乜意思，股市可以話係佢哋玩剩落嚟嘅。佢依家會買私募基金，又會買國債同信託產品，就算一年回報只得10%，但每年淨袋300萬，「咁我又何必再冒險炒股呢？」