西班牙及希臘等前景不明朗，令意大利及西班牙國債孳息再度抽高，美匯指數亦升至一年多以來高位。不過，港股昨早低開後，因MSCI指數調整成分股，令恒指由上午最多跌312點，收窄到收市跌60點，成交亦急升至765億元。
昨日共有27隻牛仔被強制收回，當中24隻為恒指牛證，而牛證重貨區則集中在18,200至18,400點，涉及10.2億份街貨，相當於1,956張對沖期指。雖然港股昨日收市唔係跌好多，不過早段曾跌穿過18,600點支持，低見18,378點，創五月跌市以嚟新低，故後市走勢未宜太樂觀，揸牛仔嘅散戶真係要小心。
在成交急升嘅情況下，認股證及牛熊證成交佔大市成交比例都回落至個位數字，前者由12.5%回落至9.4%，後者由11.8%回落至9.1%。
窩輪資金流方面，近期因板塊氣氛差而走勢持續轉弱的中移（00941），其Call輪獲資金追捧，單係周二及周三已錄得1,519萬元的資金流入，較同期流入恒指Call輪嘅資金仲多，而日前得到摩通增持、目前走勢橫行嘅騰訊（00700），卻見資金追捧其認沽證，為窩輪十大流入中嘅唯一一隻Put輪。
沽空方面，雖然沽空佔大市成交比率較前日略為回落，但仍達12.3%，如果唔係MSCI指數因素而令成交在尾市突然增加超過200億元，沽空比率相信更加驚人。
雖然農業銀行（01288）已確認副行長被調查一事，但由於四大內銀佔MSCI中國指數的權重獲上調，在基金急住追貨嘅情況下，農行避過一劫，收市倒升0.6%，而建行（00939）亦在成交增加下現大陽燭，並一度上試20日線，收市升逾2%。
實際上，建行股價經過日前大幅度的調整，暫時再下調的空間不大，加上在MSCI指數的權重上升，短期內能為股價帶來支持，看好的投資者可吼建行法興購（18554），行使價5.48元，溢價7.9%，實際槓桿6.9倍。
Handsome哥