Market Insight：高息股分段收集

日前發改委斷言唔會有「新四萬億」救市措施，憧憬祖國救市的好友固然失望。老友飯局中，有自稱熟知中南海政情嘅賓架，故弄玄虛話中央愈唔認會救市，短期有措施出台機會愈大。

尤其近幾星期內地新建設及投資審批，史無前例咁爽快，人民幣兌美元匯價也全速下滑，由月初高位貶值近1.6%，超出五月初不交收合約，未來一年貶值大約1%的市場預期，提振經濟，刺激出口的預調微調，其實經已靜雞雞陸續曝光。

放大圖片

放大圖片

芬佬掃貨有晒慣性

基金月結日，早段港股仲係死吓死吓咁款，MSCI指數成分股調整估唔到在尾市有意想不到嘅效果，換貨的買盤令內銀股成交激增，恒指跌幅收窄到60點，收市報18,629點。最精彩可算係最後兩分鐘，有超過200億元股份易手。

古勝從來都唔明點解班芬佬成日唔做，係要等拉閘前一刻先掃貨，收市後有消息，部分基金未能掃齊貨，結果要透過期指套戥相當狼狽，亦直接將六月期指挾到96點高水（剔去除息因素），收報18,530點。

回顧五月份，恒指成個月累積下跌2,464點或11.68%，好友捱足成個月，得六日升市，昨日算係攞番個尾彩。

由於risk off成為潮流，全世界熱錢湧去避險，隔晚德、美的十年國債孳息率，分別見過1.26厘及1.59厘的歷史新低。

國債回報猶如雞肋

即使用支槍指住個頭，古勝都肯定無興趣收不足1.6厘回報，去買德、美國債。客觀情況係，法國總統薩爾科齊連任失敗之後，在歐元區成員要守財政紀律以換取援助的議題上，再沒人站在德國總理默克爾同一陣線上；反過來，使慣歎慣的歐元區成員，在歐盟峰會上堅持研究發共同債券，讓低息國債長借長有。

衰啲講，德國人可能比希臘人更想退出歐元區，免得畀一班爛仔兄弟騎劫。當然這是知易行難，令人難明到底目前國債孳息率仲有幾大的下調可能。美國更不消提，官民總債務達天文數字的55萬億美元，若非可無限印鈔，加上地球上沒其他貨幣選擇，否則美債根本無可能這樣吃香。

更莫名其妙係，唔少高息股的預期股息，同債息差距可以愈走愈遠，或許有人爭辯經濟轉差，業績下跌最終可能影響派息能力，好息之徒隨時賺息蝕價。睇番中電（00002）及領匯（00823），預期息率均有4厘以上，除非全球大規模經濟災難，否則派息減少機會頗微。

中銀最適合穩陣派

再數剛除息的現金牛中銀香港（02388），往績股息率5.56厘，而十年歷史平均股息為4.5厘。

雖然貸款需求中短期未必有可觀升幅，但是近兩年業績顯示，這間本地銀行淨息差已見底，首季更有擴闊趨勢，金管局驚死本地銀行過勇承做按揭採取嚴格監管下，不見得這部分貸款業務質素有轉壞的條件，中長線而言，目前的股價是超吸引，唯一輸蝕是假如基金經理醒覺齊齊risk on，未必會先捧這類基本因素較佳高息股，反而先選跌得超殘的醜股，除息後如果回試20元水平，唔想擔驚受怕的股民，值得開始收集。

市底疲弱，呢期板塊異動熱潮持久度正在下降，好似最近家電同汽車股升勢都係兩、三日貨仔，反映炒家持貨信心不足，普遍持密食當三番嘅心態，以免一個唔覺意接下火棒。昨日幾隻內銀股抽升，但見建行（00939）沽空金額急升至12億元，真係嚇壞人！

事實上，唔係MSCI指數更換成分股呢啲日子，點會有咁多指數基金尾市出嚟掃貨，似乎市場上有班大戶對未來一個月能以低於現價攞貨補倉胸有成竹，所以趁機大手沽空，缸邊友炒作宜暫避建行為妙。

古勝