港交所（00388）呢兩年同經紀嘅關係，好似貼錯門神咁，好幾項新措施，都畀經紀鬧到拆天，當中以延長港股交易時間，衝突最大，皆因港交所企硬再縮短食飯時間。個個經紀都話冇晒時間食飯，仲有經紀走出嚟遊行抗議，不過最近就有經紀同金占士講，話其實呢個政策都有個意想不到嘅好處。
成交勁縮 咬麵包有理
呢位美資大行經紀就話，最近個市每日成交得嗰四、五百億，就好似尋日咁，全日成交都唔夠五百億，環球股市仲係好唔穩定，邊有心機炒股呀，搞到佢哋做經紀嘅個個都冇啖好食，所以佢話，cut短咗飯鐘仲好，反正都係咬麵包，唔使諗去邊度食，仲可以慳番啲錢，不過夜晚嗰餐就真係閉翳喇。
期指夜市 再戰港交所
個市唔旺，做經紀嘅真係手停口停，金占士都好同情呢個經紀朋友嘅苦況，不過啲散戶淨係喺五月份，都輸到攤攤腰，依家唔入市都可以理解，或者咁睇，其實呢樣嘢係咪印證咗港交所呢個政策對增加成交額係完全冇作用呢？經紀同港交所下一個戰場，就係期指夜市，金占士睇個勢，都幾難扭轉，夜市應該係勢在必行。
金占士