絲絲講場:中銀小股東淚的指控

尋日天陰陰,正正反映絲絲嘅心情,話說絲絲去咗中銀香港(02388)嘅股東會,大會嘅股東問答環節上,有一位小股東訴說佢嘅傷心事,講吓講吓竟然流下男兒淚,仲話中銀香港無人情味,究竟發生咩事?

代父換購紀念鈔遭拒

中銀香港早前為慶祝中行(03988)一百周年,發行紀念鈔,好多人都爭住買,買到紀念鈔原本係一件值得開心嘅事,但係對於呢位小股東,就真係不堪回首,原來呢位小股東一家人都有認購紀念鈔,佢嘅父親就抽中咗一套,但係老人家去銀行換購途中,不幸遇上交通意外身故,呢位小股東邊講邊喊,絲絲都覺得好心酸。

佢話早前帶埋啲資料,去中銀香港分行諗住換番套鈔票,但係就畀職員拒絕,佢希望銀行可以有啲人情味。中銀香港嘅公司秘書話,已經請佢留低聯絡方法,話會跟進事件喎。絲絲同行家都希望,件事可以盡快有解決,希望呢位小股東同佢嘅屋企人都節哀順變,早日走出陰霾。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!