「呯……」CFA又開鑼，但唔好以為五月咁快又開考，原來係CFA（特許財務分析師）協會尋日喺港交所（00388）主持開市儀式，敲響銅鑼慶祝CFA課程同埋CFA專業資格踏入五十周年，同日仲喺全球二十五個交易所主持開市或收市儀式，認真巴閉，足證CFA資格喺金融業有何等江湖地位！
CFA協會舉辦第一次考試時，絲絲都未出世，由六三年至今日，足足五十年囉。作為投資專業資格組織，多年嚟向金融業培訓人才多如繁星。CFA協會呢次喺全球敲鐘鳴鑼，原來係同一間機構一日之內，喺全球最多間證券交易所主持開市或收市儀式，唔知咁樣可唔可以入到健力士紀錄大全呢？
CFA五十年嚟發展得咁快，依家全球究竟有幾多人拎住CFA銜頭呢？答案係超過十萬人，分布喺全球137個國家。香港依家都有超過五千人拎到呢個銜頭，絕對唔失禮，對香港金融中心發展所作貢獻真係毋須多講。只可以講喺金融界呢個行頭裏面，攞住CFA個牌頭，搵工跳槽都易啲。咁要考到呢個資格，都要落足心機考試，因為要通過三個級別考試、累積四年合資格投資相關工作經驗、和堅守CFA協會嘅《道德操守》和《專業行為準則》。
余詩韻