希臘民調顯示，支持緊縮方案嘅新民主黨支持率領先，加上內地刺激經濟措施陸續出台，尋日幾乎個個板塊都炒上。自五月初的跌市以來，港股尋日嘅反彈可以算係最似樣嘅一次。雖然恒指升254點唔算好多，但都算整番支大陽燭，仲突破埋短期降軌，而主板成交近490億元，較前日增加約百億元。
恒指收復萬九點，尋日共有9隻熊仔及3隻牛仔被劏，全部都係恒指牛熊證。截至上周五，牛證重貨區上移至18,400至18,600點，而熊證則主要集結在19,200至19,400點，後者涉及3.8億份街貨。
日前有內銀管理人士表示，四大國有銀行今年可能因經濟增長放緩而無法實現今年貸款目標，而內地五月嘅新增貸款規模亦很可能低於四月，有關內銀嘅負面消息不絕，不過唔好唔記得我哋有阿爺撐，除咗可能放多次水，仲可能會減息，而閃批基建項目亦有助提升融資嘅需求。
中國銀行（03988）股價近日在2.8元水平觸底後，成功收復10日線，昨日上試保力加通道中軸，MACD牛叉初現，走勢改善，看好此股，可小注博中行大和購（18484），行使價2.98元，溢價7.5%，實際槓桿6.7倍，為人氣之選。
Handsome哥