孖妹S檔案：投資銀行財藝雙全
經常穿梭中環、金鐘等地嘅孖妹，唔難發現周圍擺放咗唔少藝術品，瞬即為營營役役嘅金融世界帶嚟啲浪漫。尤其係投行嘅辦公室及會議室，總充斥着雕塑、攝影、繪畫等藝術品，成個小型藝術展覽館呀！其實，不嬲都以金錢掛帥嘅投資銀行，其藝術投資會否純粹係企業責任，唔講投資回報架？
香港國際藝術展（ArtHK）啱啱先結束，畢加索珍品展又開鑼，孖妹當然要即刻去「朝聖」！不過，睇完畢加索嘅畫作，發覺同我哋細個時幼稚園貼堂嘅作品有異曲同工之妙，即時覺得自己才華洋溢，假以時日必可震撼畫壇！哈哈，然而我哋都係醉心股票投資架喇，惟近日大市氣氛低迷，一於趁呢個藝術氣息濃厚嘅環境，暫且踢開股市上嘅陰霾，享受吓金融界嘅藝術文化！其實，除咗ArtHK同畢加索展，喺投行嘅辦公室都有唔少藝術品可供觀賞架！
講開投資銀行嘅藝術文化，當然要搵中文大學全球政治經濟社會科學碩士課程客席講師黃元山啦！他曾任多間投行高層，仲成日遊覽紐約、倫敦嘅藝術館，認為藝術同金融係相互影響嘅範疇，可以帶嚟發展契機。
黃：中文大學全球政治經濟社會科學碩士課程客席講師黃元山
高妹：近排個市咁差，藝術市場亦受到影響！我哋發現喺西方藝術市場廣泛使用嘅梅摩藝術品指數（Mei Moses Art Index），今年頭四個月就下跌咗0.6%，主要係因為美國經濟復甦緩慢，加上歐洲經濟仍未見起色，中國經濟亦正在調整呀！
藝術交易同受制大市
黃：係呀，藝術同經濟有莫大關係架！正如藝術品指數喺○八年前升得好犀利，但金融海嘯除咗衝擊環球經濟外，藝術品交易同樣受到影響。因此，如果大市表現好，藝術品市場嘅氣氛無疑會較為做好！
彩兒：咁你點睇投行嘅藝術呀？
黃：依家好多投行都騰出空間去擺放藝術品。我最記得之前有一次去愛爾蘭其中一家銀行開會，其會議室放滿當地藝術品，可見當地金融業支持番本土藝術，係一個好好嘅風氣！
高妹：唔使去到愛爾蘭呀，其實香港都有好多銀行支持藝術文化，展示咗唔少藝術品架！
黃：世界上嘅金融之都多係藝術重鎮，就好似紐約同倫敦，藝術文化氣息都好重，而香港亦大有潛力發展成亞洲嘅藝術交易中心，就好似啱啱結束嘅ArtHK就已經匯聚咗唔少藝術家同收藏家喇！
彩兒：啲藝術品多數展現喺金鐘、中環等金融中心地帶！
黃：金融業有嘅資金相對雄厚，有能力投資到藝術品，藉以鼓勵藝術家創作，金融與藝術本來有着千絲萬縷嘅關係。而投行擁有較多高端客戶，他們會追求生活品味，對藝術文化有較多認知，較易對藝術品產生興趣熱情！
高妹：成日都聽人話「投資係一門藝術」！睇嚟我哋金融界孖妹，日日都做緊藝術啦！
黃：哈哈，兩者確有唔少相似之處！藝術品價值由好多因素構成，如藝術家背景、創作區域、流通性高低等，同決定基本價值及升值前景，睇落同揀股一脈相承！再講，真正嘅藝術品應如好股一樣，經得起時間嘅考驗！
市場上好多名家畫作，皆不乏收藏家，其流通量亦高，就好像藍籌股一樣屬穩健之選，升值潛力可見一斑。至於一啲新進畫家之作，則仍需經過時間嘅磨練，如科技股或仙股嘅潛力般有待發揮，大多係炒預期表現，並唔保證能夠回本或賺錢架！
彩兒： 但係咁喎，股票就話可以睇基本因素，藝術品可以睇啲咩去分析呀？好似好主觀咁！
觸覺佳或可執「平貨」
黃：的確，藝術領域會牽涉到主觀因素，唔似股票咁可以睇市盈率、毛利率等客觀條件，而藝術品亦難以比較。所以呢，如你本身對藝術品有所認知就有機會買到「平貨」，否則或有可能買貴咗o架喇！
另外，股票買賣可以喺交易所進行，大家都係明碼實價去對盤買賣，但部分藝術品交易價就要由買賣雙方洽談，有時仲會拗價拗到牙血都出埋架！
MW：德意志銀行亞太區傳訊部主管Michael West
KH：法國興業銀行亞太區傳訊部主管向凱琦（Kate Henley）
德銀藏品逾56000件
高妹：講到從事藝術品收藏嘅投行，你哋銀行可謂表表者，收藏多不勝數！
MW：德銀喺七○年代就開始收藏藝術作品，依家嘅藏品數量已經超過56,000件。大部分嘅藝術品會展放喺畫廊、展覽館等場所，開放畀公眾參觀，另有部分藝術品會放喺辦公室內，為員工帶嚟一個愉悅嘅工作環境。
KH：我哋九五年喺總部設立藝術館，現已收藏咗多位藝術家過千件藝術品，目的係同社會大眾及客戶作出交流互動！
彩兒：你哋收藏藝術品，係咪視之為企業責任去回饋社會？
MW：我們一直都有牽涉到唔同範疇嘅社會項目，而藝術投資係當中重要嘅一項企業責任呢！我們今年贊助咗ArtHK，除對公司形象有正面作用之外，仲遇到唔少新客戶添！
KH：藝術具有凝聚力量，可肩負起溝通聯繫嘅角色，所以銀行喺呢幾十年都會舉辦多項活動去支持藝術發展。我們今年更對香港法國五月藝術節作出支持，贊助其中一個攝影展，今次嘅作品亦成為藝術珍藏的一部分。
高妹：你哋嘅藝術品主要係展覽之用，但唔會轉售出去，咪無錢賺囉！
法興冀建立多元化收藏
MW：咁又唔可以咁講！我哋做企業責任嘅時候，同時亦促進社區嘅文化經濟。而社會上嘅各項事物都係環環相扣o架嘛，所以我哋都有可能會獲益！
彩兒：我見啲藝術品係以當代藝術為主，有冇特別原因架？
MW：因為銀行主要支持一啲新進藝術家，好讓他們有更多發展空間，所以咪以當代藝術為主囉！
KH：我哋想喺商界及社區推動文化發展，令各界都有機會了解及享受藝術，所以銀行會收藏唔同類型嘅藝術品，亦唔會偏重某個地區，冀望可建立多元化嘅藝術收藏！
高妹、彩兒
若有料報畀高妹同彩兒或有嘢問，
可電郵money.biz@opg.com.hk