Market Insight：置富最啱好息之徒

受Bankia的新聞影響，歐元兌美元低處未算低，收今年新低見1.2517。有大行trader話隨着歐元淨短倉未平倉合約，不斷創新高，去到上星期二逼近19.6萬張，估計1.25的大位一穿，下一站要睇1.19至1.2水平，返到一○年六月時水平。

六月十七日希臘國會選舉，加上近期存款逃離希臘銀行體系速度加快，各方憂慮人口千一萬歐洲小國，最終踏上賴債違約之路！周末，希臘新民主黨開始展開國會競選工程，主要同選民說明，揀激進左翼等於變相公投，讓希臘離歐元，後果將會是災難性。有時對住普羅大眾，一味靠嚇原來真係有用，民調顯示，希望新民主黨支持度，較左翼聯盟反先半個老鼠鼻。

放大圖片

放大圖片

解財困冇咁易

事實上，希臘媒體自去年九月至今幾個調查，唔希望見到希臘脫離歐元區的市民，一直介乎65至71%，反映出，雖然希臘人唔想揸頸就命，被歐盟逼減福利減人工，不過，更擔心一朝希臘同歐盟反面，經濟崩潰、通脹失控、公務員無糧出，在兩害取其輕下，左翼激進派三個星期後唔可以話贏硬，但兩邊陣營勢均力敵，撕裂民意要有效短期解決財政困難，看來是殊不容易。

由上星期資金流數字，環球股票基金錄得63億美元淨流出，創出今年新高，值得留意，是今次基金看來是為套現而套現，傳統避險黃金基金一樣有12億美元的淨流出，是今年以來最勁，債券基金有5億美元淨流出，亦係今年首次，資金無處容身，115億美元泊落Money market fund。

筆者搵番去年九、十月，全球股市急跌後大奇迹反彈的經驗，當其時股票基金連續幾星期錄得50至100億美元，累積超過240億美元淨流出後，大市強力反彈先出現，五月全球股市陰雲密布，但隊得咁有秩序，始終未見恐慌性拋售，陰陰乾反而對加速市況見底不利，亦最磨滅好友嘅鬥志。

汽車股可（目及）實

展望未來兩三周環球股市仍然波動，某個角度睇有國策大力支持的板塊應可繼續吸引避險資金停留，如上周提過的鐵路股，另家電同汽車股亦是炒上落的好對象。上周五午後比亞迪股份（01211）股價突然有買盤掃高，股價由低位15.06元反彈至高位16.38元，收報16.2元，升6%；而華晨（01114）亦在大行唱好之下，股價升4%。若然本周初汽車股成氣候，追落後可以（目及）實東風集團（00489）。

不過，家電股則宜避開國美電器（00493），事關上周五公布首季純利急挫88%，收入亦跌28%，反映市場對公司盈利前景的憂慮並非無中生有。由於次季經營情況進一步轉差，新一輪的家電補貼政策能否打救國美，致令其本年度業績能免於「見紅」，實在難講。為免犯險，市面上有多隻家電股可供選擇，都是另作他選為妙。

股市雖跌，錢多、息低卻繼續在資產市場上推波助瀾，反映樓價的中原城市領先指數剛創新高，無奈地產股有太多因素困擾，令芬佬卻步，一來是七一特區換班後，長遠房屋政策仲未明朗，而近日先後有本地地產商因政商貪腐被捕，畀人感覺無咁巧合，為免踩中地雷，芬佬惟有無奈忍手，近期鮮見大行出嚟就本地樓價升唔停，調升地產股估值。

低息助長投機

美國零息期最少玩到一四年底，資金成本持續低企，無疑令本地樓價及租金不斷攀升的其中一個因素，低息等同助長借貸及投機，反而懲罰審慎理財，靠收息過活的退休人士，就這一點，除非金管局有「吉士」將港元同美元脫鈎，否則要扭轉泡沫繼續擴大唔易，至愛的領匯（00823），大孖沙批唔死又見回穩，上星期逆市做好重返30元樓上，剛發表分家言論的超人，旗下置富（00778）上星期收4.4元，也逼近4.46元的掛牌以來新高，相比繼續保守地放錢入簿仔收息或者買債券，房地產信託基金始終較受惠於租金增長環境，亦避卻被「零息」繼續懲罰。

展望未來兩年，和富及麗城的收購執靚後，有助提升租金收入，現價預期息近6.6厘，儘管大升市無佢份，但置富勝在買來收息，刻下風險有限。

古勝