買樓不如買地產股

四叔雖未肯預測年底時樓價會升抑會跌，但坦言「住宅樓我會賣晒先」，「依家有成萬個單位等緊入伙紙，政府又要推居屋公屋，加上投地，供應大咗，貨多個市就唔爽」，他說「你買普通樓只會起少少，幾年唔會大起，依家買樓不如買股票。」

地產股兩年博倍升

四叔指自己「睇唔通」目前市況，指歐洲非常反覆，希臘七個一皮（意即極度混亂），又有對沖基金漁利，令市場「心驚膽顫跌過龍」，現在本港地產股整體有達六成折讓，他建議朋友「不如買股票，一兩年後一千萬可以升一倍到二千萬。」

事實上，財政司司長曾俊華昨日於網誌亦指，本港樓市風險與日俱增，政府會時刻保持警惕，並密切留意市況，如有需要會毫不猶豫再出招，以確保樓市健康平穩發展。

被問到應該買邊隻？四叔說：「我做恒地、新地（00016）董事，唔講得，否則犯法。」但他以恒地為例，「恒地我估值100蚊，依家就唔夠40蚊，好抵買，等兩、三年後復甦，折讓收窄，等於可以升一個開。」

但買樓就要睇兩、三年長線，四叔坦言樓市除了外圍因素，還有政策壓抑：「同佢（政府）鬥氣棧嬲」，但他相信政府推居屋及公屋「唔會太離譜」。至於豪宅市場，四叔指內地經濟轉差，現在只得最好時期的兩、三成購買力，「嗰陣時一開個價就殺落嚟買，都唔問價」，但他補充，「香港背靠大陸，遍地黃金，實無死。」

國企股「查清楚才買」

四叔早年被喻為股神，因大手買入國企新股帳面勁賺，但四叔現在表示：「依家我退出，停賽」，因為「國企股跌到離晒譜，唔識諗，依家唔同晒，大陸嘢不知底細，查清楚先好買。」

至於恒發（00097），四叔指該公司無大作用，當是殼股，但拒絕透露如何注資，只表示：「到時睇有咩用。」