facebook（fb）臨近上市，新聞、傳聞真係特別多，今次輪到美國兩大汽車公司通用（GM）同福特隔空開火，一個唱衰、一個唱好fb。GM話喺fb賣廣告，效力真係麻麻，仲要抽起1,000萬美元廣告，但對手福特就搭訕話佢哋喺fb嘅廣告冇問題喎。
美國網站Marketplace嘅記者首先爆料，話GM市場部嘅負責人審視過喺fb賣廣告嘅效力覺得麻麻哋之後，就向fb問罪，然後就話要抽廣告。之後呢位記者喺另一社交平台Twitter踩多腳，話廣告費涉及1,000萬美元。
點知福特公司就針對呢件事，係Twitter入面留言話，「廣告效力只不過係執行能力嘅問題，我地喺fb嘅廣告好有效，因為策略上融合左創意同埋負責任嘅內容」，咁講嘢，明寸GM嘅執行能力有問題啫。
據了解，GM係全美第三大賣廣告最多嘅公司，今次事件之後，GM目前只會用fb入面嘅免費資源做推廣，暫時唔會畀錢fb賣廣告住。事件喺fb上市之前爆出嚟，有人就覺得係陰謀論，要大家反思fb嘅廣告效力喺咪咁勁、市值係咪真係咁貴先？