王美珍（Phoebe）跳槽過大新銀行（02356），出任零售銀行處主管，唔經唔覺已經三個月，尋日大新喺馬鞍山開分行，有成三千呎，絲絲見佢四圍同賓客打招呼，對腳好似唔識攰咁，原來佢放假期間做咗好多運動呢！
Phoebe話返新工前，放咗六個月假。伊人長假多多搞作，除咗陪囡囡去英國讀書，仲去學Tango、做Pilate同去cruise（郵輪），去過西班牙嘅Phoebe話「真係唔覺得失業率有20%喎」。
Phoebe之前擔任過外資同華資銀行要職，今次加盟港資銀行，認為銀行有發展潛力，原來銀行喺幾年前已開始買舖開分行，Phoebe笑話「依家都應該升晒值喇」。大新銀行不斷優化分行，絲絲問Phoebe銀行下一個大計，佢神秘咁話「大家拭目以待啦」，真係識賣關子喇！