香港嘅最低工資係時薪28蚊，中電（00002）前執行董事謝伯榮啱啱同中電簽咗份顧問服務合約，時薪有3,200蚊，聽落好似好誇張，但大家唔使眼紅，佢話晒資歷超過三十年，同好多打工皇帝比，呢個價錢好濕碎，況且佢唔係日日都要畀中電「問」，唔會日日有工開，絲絲雖然都係中電股東，一啲都冇肉痛，反而覺得均真呢。
人生有幾多個十年！更何況係三十年，謝伯榮喺中電服務三十年，宣布榮休，喺尋日開始正式退任執行董事，轉做非執行董事。佢仲同中電簽咗一份一年期嘅服務合約，搵佢為中電提供有關物業/地產方面嘅顧問服務，時薪3,200蚊！以往都有上市公司同一啲專家簽顧問合約，通常以一筆過費用或將顧問費以月計，好少計時薪。查實呢個時薪高唔高呢就見仁見智，絲絲睇過中電最新年報，謝生嘅總薪酬1,150萬元。
謝生今年61歲，喺一九八一年加入中電，至到二○○○年二月就開始出任公司董事，仲擔任過財務總裁至到○九年，之後再開始做執行董事，係中電少數嘅華人管理層進入董事局。佢擁有機械工程同埋會計師專業資格。
絲絲就好奇，謝生以前一直喺中電都係管理內地業務拓展同財務，點解忽然走去做地產顧問。絲絲聽番老友講，謝生喺中電咁多年，曾經參與過唔少物業及地產事務，仲做過中電地產同嘉賀地產兩間中電附屬公司嘅董事，所以謝生退休之後，會喺呢方面做顧問，令到物業同埋地產業務可以順利過渡咁話。
中電搞緊總部重建，謝生大可以顧問身份畀意見。