絲絲講場：李永鴻復出 入富邦揸旗

喺好多家大型銀行都擔過大旗嘅李永鴻（圖），最近終於喺寶島回歸喇，今次加入富邦銀行，接替梁培華出任CEO一職，算係幫補吓香港咁喇。讀書就有「讀萬卷書不如行萬里路」，李永鴻嘅工作經驗都有類似嘅影子o架。

浸過鹹水 30年經驗

李兄除咗係專業會計師外，更加係資深嘅銀行家，佢擔任過紐約銀行嘅高級副總裁，又喺美國銀行做過八年，「浸過鹹水」之後加盟中銀香港（02388），華資同外資銀行嘅經驗佢都有，都稱得上係一位「國際銀行博士」喎。

唔講唔知，原來李兄喺○九年曾經宣布正式退休，今次復出梗係因為「坐唔慣」，又係嘅，佢嘅銀行經驗儲儲埋埋都有三十年喇，或者已經當咗銀行係屋企，唔捨得走啦。

值得一提嘅係，原來李兄喺入主富邦銀行之前，曾經喺台灣嘅花旗銀行做多項要職，唔通銀行請高層首重見聞廣博？絲絲自認閱歷不足，依家都應該訂下「行萬里路」嘅目標至得喇！