早幾日，絲絲先講完香水公司Coty再次向美容產品直銷商雅芳（Avon）「提親」，加咗禮金之餘，仲有「股神」巴菲特撐腰，仲以為求婚成功機會好高，好可惜喺新娘雅芳嘅扭扭擰擰之下，新郎終於忍受唔住，話對方一直拖延，最後決定「唔娶喇！」──撤回嗰107億美元嘅收購提議。
其實「皇帝女唔憂嫁」嘅雅芳曾軟化過，話願意考慮Coty最新提議，但希望可以延後一個星期先再決定係咪展開協商。對於雅芳一再拖延，Coty個董事長當然唔太like喇，發聲明話，佢曾經嘗試同雅芳董事長對話，但結果只係收到一封短短兩行字嘅電郵，而且唔願意進行協商嘅態度令Coty心灰意冷，所以Coty決定放棄喇，慳番啲時間去搵其他機會仲好咁話。
喺今年四月嗰陣，Coty第一次以100億美元諗住收購雅芳，可惜最後對方嫌價格太低而告吹咗。然後Coty上個星期喺巴菲特嘅支持下，將收購價提升至107億美元，最後仍然失敗。絲絲就覺得，由於依家歐美經濟咁差，Coty大把平貨可執，所以分分鐘今次係雅芳走寶喇！