絲絲講場：英國一日假唔見288億
法國因為有新總統上台，有可能結束緊縮經濟政策，但作為「歐豬五國」之一嘅葡萄牙就因為要緊縮，而喺早前通過咗將全年公眾假期由14日削減至10日，所持理據係減少公眾假期，可以增加市面經濟活動，從而提升國家競爭力。咁究竟放一日假會為全國帶嚟幾多損失呢？
《魔鬼經濟學》嘅作者就喺自己嘅網誌度探討呢個問題，葡萄牙就暫時未有數據。
葡國緊縮 決定減假
不過佢哋就搵到英國《每日郵報》嘅數字，發現英國放一日紅假，就為全英帶嚟37億美元（約288.6億港元）嘅經濟損失！原因係紅假除咗商店同餐廳有經濟得益之外，其他行業都係淨虧損，聽起嚟都好嚇人。
咁全世界邊一個國家嘅僱員擁有最多假期呢？《經濟學人》嘅調查就發現，頭三位依次係奧地利、希臘同埋法國，全年分別有38、37、36日假期，當中包含咗法定最少25日僱員假期，以及11至13日嘅公眾假期。中國僱員總共有21日假期，喺受訪國家中排第17。
話時話，希臘同法國嘅國民都係歎慣，唔怪得叫佢哋經濟緊縮就個個牙痛咁聲，人人上街示威啦。